Inaapresyar daw Nindo an Sagradong mga Bagay?
1 Kun hinahapot kun baga inaapresyar niato an sagradong mga bagay, posibleng marhay na kita masimbag tolos nin iyo! Ano an nagkapira sa sagradong mga probisyon nin Dios na inaapresyar niato?
2 Kanigoan niato kamahal an personal na relasyon sa satong langitnon na Ama na itinotogot na mapasato! Inaasegurar nia kita na kun kita ‘marani sa saiya, sia marani sa sato.’ (Sant. 4:8) Kun mayo kan pantubos na atang ni Jesu-Cristo, mayo nin tawong makaaako nin buhay na daing katapusan. (Juan 3:16) Huli sa sinserong pagpasalamat, aroaldaw na ipinahahayag niato sa pamibi an satong hararom na pag-apresyar sa mahal na marhay na balaog na ini nin Dios.
3 An ipinasabong na Tataramon nin Dios, an Banal na Biblia, sagrado man para sa sato, siring kan daganon na organisasyon ni Jehova. Ipinaheheling niato an nanonongod na pag-apresyar sa mga probisyon na ini hale ki Jehova kun kita namumuhay oyon sa mga prinsipyo sa Biblia, pinakokosog an bogkos nin sa magturugang na pagkamoot, maingat na sinusunod an teokratikong areglo, asin nakikikooperar sa mga nangengenot.—1 Ped. 1:22.
4 Paagi sa fiel asin may diskresion na oripon, kita nag-aako nin abundang espirituwal na kakanon. Iyan magigin totoo man ngonyan na taon sa “Mga Paraotob kan Tataramon nin Dios” na Pandistritong Kombension. Duman mag-aako kita nin mahalagang marhay na pagtotokdo asin magkakamit nin nakaoogmang pakikiasosyar na kaipuhan niatong marhay. Paano niato ikapaheheling an odok sa pusong pag-apresyar sa sagradong probisyon na ini?
5 Dai Pagpabayaan an Harong ni Jehova: Sinadol ni Nehemias an mga nagpagal sa pagtogdok liwat kan mga lanob kan Jerusalem na ‘dai pabayaan an harong kan saindang Dios.’ (Neh. 10:39) Ngonyan, an “harong” ni Jehova iyo an saiyang areglo para sa pagsamba. An satong pandistritong mga kombension kabtang kan areglong iyan. Tangani na dai mapabayaan an areglong ini, dapat na kita umatender asin mag-atentong marhay, na ipinaheheling ki Jehova na inaapresyar niato nin labi-labi an saiyang mga probisyon. (Heb. 10:24, 25) Anong mga plano an maninigo niatong gibohon ngonyan tangani na ipaheling na lubos niatong inaapresyar an sagradong okasyon na ini?
6 Umatender sa Bilog na Tolong Aldaw: An balang saro sa sato maninigong magplano na umatender sa bilog na tolong aldaw kan kombension. Kamo daw nagpaplanong umabot nin amay kada aldaw asin magdanay sagkod sa pangultimong pamibi sa Domingo? Kun iyo, mapapasaindo an mayaman na mga bendisyon. Tibaad bako pirmeng pasil an pag-atender sa kombension. An pag-areglar kan saindong sekular na trabaho tibaad mangaipo na kamo marigon na manindogan. Tibaad bako pirmeng kombenyente an transportasyon. Alagad dai pagtogotan an mga bagay na ini na panluyahon an boot nindo sa pag-atender sa kombension.
7 Estudyare an Ekselenteng Halimbawang Ini: Mantang paduman sinda sa sarong pandistritong kombension kan nakaaging taon, natuparan nin sarong grupo nin mga tugang sa sarong nasyon sa Aprika kun saen may sibil na kariribokan an sarong grupong militar. Hinapot an mga tugang: “Siisay kamo, asin masaen kamo?” Sinda nagsimbag: “Mga Saksi ni Jehova kami, asin paduman kami sa pag-atender sa pandistritong kombension.” Nagkomento an saro sa mga soldados: “Kamong mga Saksi ni Jehova dai nin ano man na kinatatakotan. Padagos sana kamo, asin ta mahihimo nindong gibohon an saindong kombension na mayo nin ano man na problema. Minsan siring, dapat na maaraman nindo na dakol na soldados kamong manunuparan. Pirme kamong maglakaw sa tahaw kan tinampo! Kun may maheling kamong dakol na tawong nagkakatiripon, padagos kamong maglakaw sa tahaw kan tinampo!” Ginibo ninda iyan asin nakaabot nin ligtas sa kombension. Binalosan an mga tugang na ini huli ta ipinaheling ninda an saindang pag-apresyar sa sagradong mga bagay.
8 Arog kan satong mga tugang sa Aprika, kita man napapaatubang sa mga angat. Alagad daing duda na puede niatong arogon an saindang pagtubod asin magin desidido na umatender sa gabos na sesyon kan satong pandistritong kombension. Kun kaipuhan nin mga pagliliwat, umasa ki Jehova para sa paggiya, sa pakaaram na bebendisyonan nia an satong mga paghihingoa na umatender sa bilog na programa.
9 Mag-ani nin mga Bendisyon: May pagmawot kita para sa Tataramon nin Dios, sa pakaaram na paagi kaiyan kita puedeng tumalubo sa kaligtasan. (1 Ped. 2:2) An satong pag-atender sa pandistritong kombension asin paghinanyog sa programa makatatabang sa lambang saro sa sato na makapatalubo nin mas makosog na pagtubod sa Tataramon na iyan asin sa siring magin mas may kakayahan na paglabanan an mga pagsalakay ni Satanas. Sa paggibo kaiyan, ipaheheling niato ki Jehova asin sa gabos na nagmamasid na lubos niatong inaapresyar an sagradong mga bagay patin “bako kita an klase na minasibog . . . kundi an klase na may pagtubod sa ikapagdadanay na buhay kan kalag.”—Heb. 10:39; 12:16; Tal. 27:11.
10 Puede niatong antisiparon an pagbukas ni Jehova Dios kan mga gaha kan kalangitan asin pag-ula sa sato nin abundang espirituwal na mga bendisyon. (Mal. 3:10) Gibohon na pasohan nindo na umatender sa “Mga Paraotob kan Tataramon nin Dios” na Pandistritong Kombension poon sa mismong pagbukas kan programa sa Biernes na aga sagkod sa pantapos na pamibi asin “Amen!” sa Domingong hapon. Maoogma kamong ginibo nindo iyan!