Gamiton an mga Pangyayari sa Presente sa Pagpukaw nin Interes
1 Boot daw nindong magkaigwa nin dagos-dagos na suplay nin marahay na mga ideya na pagdadanayon an saindong ministeryo na bago asin nakakapukaw kan interes nin mga tawo sa mensahe kan Biblia? Kun siring gamiton an nangyayari sa kinaban asin sa saindong komunidad tangani na makapoon nin mga pakikipag-olay. Puede kamong kumua sa lokal asin nasyonal na mga pangyayari sa presente o internasyonal na mga bareta. An mga bagay na ini padagos na nagbabago. (1 Cor. 7:31) Estudyare an minasunod na mga halimbawa.
2 An mga problema sa pagbuhay asin an halangkaw na mga presyo nin barakalon tunay na ikinahahadit nin mga tawo. Sa siring, puede nindong sabihon:
◼ “Nabaretaan na daw nindo na [sambiton an bagay] naglalangkaw giraray an mga presyo?” O puede kamong magkomento manongod sa kadaihan nin trabaho kun sinisante nin sarong dakulang kompanya an dakol na trabahador. Depende sa kun paano nindo gustong magpadagos sa pakikipag-olay, puede kamong magpadagos paagi sa paghapot magsalang nin “Napaghorophorop na daw nindo kun taano ta masakit na gayong maghanap-buhay?” o “Sa paghona daw nindo pirmeng magigin masakit an pagpatamatama kan entrada?”
3 An mga bareta dapit sa kadahasan, siring baga kan mga trahedya sa mga pamilya o sa tahaw kan mga estudyante sa eskuelahan, nagtatao nin basehan para sa saro pang pakikipag-olay. Puede nindong ihapot:
◼ “Nabasa na daw nindo sa diaryo na [sambiton an trahedya sa komunidad]?” Dangan maghapot magsalang nin “Ano sa paghona nindo an dahelan nin grabeng kadahasan sa kinaban?” o “Sa paghona daw nindo maabot pa an panahon na kita makakamate na tiwasay?”
4 An mga bareta manongod sa nandedestroso nin grabe na mga baha, linog, o sibil na kariribokan sa laen-laen na parte kan kinaban nagtatao man nin materyal na nakapupukaw nin interes. Halimbawa, puede nindong ihapot:
◼ “Responsable daw an Dios sa [sambiton an natural na kalamidad]?” O puede nindong darahon an atension sa pinakahuring biglang pagkaigwa nin sibil na kariribokan patin magsabi: “Kun gabos gusto nin katoninongan, taano iyan ta masakit na marhay na makamtan?”
5 Magdanay na alisto sa mga pangyayari sa presente na magagamit nindo sa saindong introduksion. Makukua an nakakatabang na mga suhestion sa irarom kan “Current Events,” sa pahina 10-11, kan librong Reasoning. Minsan siring, likayan na kumampi sa politikal o sosyal na mga isyu. Imbes, darahon an atension sa Kasuratan asin Kahadean nin Dios bilang an solamenteng permanenteng solusyon sa mga problema kan katawohan.