Paghuhulit sa Sarong Pabarobagong Kinaban
1 Madalion nanggad na magbago an situwasyon! Bigla na sana, puedeng magin topiko nin orolay an sarong natural na kalamidad, krisis sa ekonomiya, grabeng kariribokan sa politika, o sarong trahedya na may dakulang publisidad. Minsan siring, an mga tawo tibaad marikas man na itao an saindang atension sa iba pang bagay. (Gibo 17:21; 1 Cor. 7:31) Sa pabarobagong kinaban na ini, paano niato makukua an atension kan mga tawo tanganing ikahiras sa sainda an mensahe kan Kahadean?
2 Mansayon an mga Ikinahahadit kan Kaolay: An sarong paagi tanganing makua an atension kan mga tawo iyo an pagsambit kan mga nangyayari sa presente. Sa pagsadol sa saiyang mga parahinanyog na pakaisipon nin seryoso an manongod sa saindang kamugtakan sa atubangan nin Dios, nasambitan ni Jesus sa sarong okasyon an dai pa sana nahahaloy na mga trahedya na nasa saindang isip. (Luc. 13:1-5) Sa siring man na paagi, kun iinaatubang an maogmang bareta, marahay na sambiton niato an sarong napapanahon na bareta o lokal na isyu na nakaaapektar sa buhay kan mga nasa teritoryo niato. Minsan siring, kun ipinakikipag-olay an siring na mga bagay, kaipuhan kitang mag-ingat na dai kumampi sa mga isyung politikal o sosyal.—Juan 17:16.
3 Paano niato maaaraman kun ano an presenteng nasasaboot kan mga tawo? Tibaad an pinakamarahay na paagi iyo an pagpalataw sana nin sarong hapot dangan maghinanyog. (Mat. 12:34) An pagigin interesado sa mga tawo pahihiroon kita na tawan nin atension an punto de vista nin iba asin mataktikang magdagdag nin hapot. An basta na sana minaluwas na komento nin sarong kagharong tibaad maghayag nin ikinahahadit nin dakol sa lugar na iyan asin puedeng magbukas kan dalan tanganing makapagpatotoo.
4 Pag-andam nin Presentasyon: Sa pag-andam para sa paglilingkod sa langtad sa sarong pabarobagong kinaban, magagamit niato an librong Reasoning. An nakatatabang na mga suhestion kun paano ikokonektar sa satong presentasyon an mga nangyayari sa presente nakalista sa pahina 10-11 (p. 11-12 sa Tagalog), sa irarom kan “Crime/Safety” asin “Current Events.” May kaparehong impormasyon na manonompongan sa An Satong Ministeryo sa Kahadean na Setyembre 2000, pahina 4. Kun inaandam an saindong presentasyon, seguradohon na iiba an sarong angay na teksto.
5 Mantang tinatawan niato nin atension an pabarobagong mga ikinahahadit kan mga nasa satong teritoryo, kaipuhan niatong ibagay dian an satong presentasyon kan maogmang bareta. Sa paaging iyan, nakikipag-olay kita sa mga tawo manongod sa kun ano an nasa saindang puso. Paagi kaiyan, natatabangan niato an dakol pa na mamidbid an Saro na daing liwat-liwat sa saiyang mga kualidad asin pamantayan.— Sant. 1:17.