Dalawon Nindo Liwat an Nanompongan na Interes
1 Importante na dalawon ta liwat an napasakamotan nin mga magasin asin brochure asin pagmaigotan na pukawon an orog pang interes. An satong kapangganahan sa paggibo kaiyan minadepende sa kun gurano kita nag-aandam nin marhay bago kita dumalaw liwat.
2 Girumdomon na an kadaklan na hobenes nahahadit dapit sa kaparehong mga bagay na ikinahahadit nin mga adulto. An mga luwas na Mayo kan Awake! sinisiyasat an presenteng mga problema sa punto-de-vista nin mga hobenes. An mga artikulo makakatabang sa mga hobenes asin sa saindang mga magurang na apresyaron an tunay na mahalaga sa buhay.
3 Kun nakapasakamot kamo kan Mayo 8 “Awake!,” puwede nindong planohon na pasundan iyan paagi sa pag-alok kan Mayo 22 na luwas. Puwede kamong magsabi:
◼ “An huring luwas na iwinalat ko ipinaliwanag an tema manongod sa paglaom para sa kaakian. An mga hobenes ngonyan nakakamate na kakadikit kan paglaom para sa ngapit. Dakol sa sainda an nagpapaheling nin paghinanakit paagi sa rebelyosong paggawe. Pero an iba pinangangaptan an halangkaw na mga pamantayan. An artikulong ini sa pinakabagong Awake! nagpapaliwanag kun paano an halangkaw na korte sinosorog an paninindogan nin sarong tin-edyer. Sa paghona ko aapresyaron nindo an sinasabi kaiyan.”
4 Puwede kamong magdesisyon na mag-alok nin brochure na ginagamit an pag-atubang na ini:
◼ “Naogma ako sa satong pag-orolay kan nakaagi manongod sa ngapit kan dagang ini. [Ipaheling an retrato sa pahina 31 kan brochure na What Is the Purpose of Life—How Can You Find It?] Mangnoha an mga bersikulong ini sa Biblia sa pahina 29 asin 30 na nagsasabi kan mga bendisyon kan Kahadean nin Dios. [Pumili nin sarong teksto, asin basahon iyan sa brochure.] Boot kong iwalat ini saindo.”
5 Sa pagbalik nindo, tibaad maaraman nindo na an kagharong igwa nin sadiri niang relihiyosong literatura asin nakakamate siang igo na iyan. Puwedeng sabihon nindo:
◼ “Ano man an satong relihiyon, apektado kita gabos nin krimen, seryosong helang, mga kahaditan sa palibot, bako daw? [Pakomentohon.] Sa paghona daw nindo igwa nin tunay na solusyon sa mga problemang ini? [Basahon an 2 Pedro 3:13.] An katuyohan kan satuyang literatura sinasabi sa pahina 2 kan An Torrengbantayan. [Basahon an piniling saro o duwang sentence.] Dakol na tawo na bakong Saksi ni Jehova an naoogmang basahon an samong mga publikasyon huli sa may paglaom na mensahe na yaon dian, na basado sa Biblia.”
6 Puwede nindong gamiton an pag-atubang na ini:
◼ “Kan nakaagi kong pagdigdi, nag-olay kita dapit sa mga paglaom sa ngapit para sa satong kinaban. Ano an saboot nindo dapit sa baretang ini? [Sambiton an sarong presenteng bareta na ikinahahadit.] Kun nakakadangog an mga tawo nin mga bagay na arog kaiyan, nagkacausa iyan sainda na maghorophorop kun saen paduman an kinaban na ini, bako daw? Naniniwala kami na an siring na mga bagay nagpapaheling na kita nabubuhay na sa ‘huring mga aldaw’ na ihinula sa Biblia sa 2 Timoteo 3:1-5.” Ipadagos an pag-orolay manongod sa saro kan mga subtema sa pahina 234-8 kan librong Reasoning.
7 Kun nag-aandam kitang marhay asin nagpapaheling nin tunay na pagmawot na makatabang, makakasarig kita na maghihinanyog an mga sadiosan an puso.—Juan 10:27, 28.