Balikan an Napasakamotan nin mga Magasin Asin Brochure
1 Pinakosog ni Jesus an saiyang mga parasunod na gumibo nin mga disipulo. (Mat. 28:19) Iyan nangangahulogan nin orog pa sa pagpasakamot sana nin literatura; kaipuhan tang bumalik tanganing magtao nin dugang pang espirituwal na tabang sa mga nagpapaheling nin interes.
2 Kun itinampok ta an sarong artikulo sa saro sa mga magasin kan enot na pagdalaw niato, marahay na ipakipag-olay an iyo man sanang tema pagbalik niato:
◼ “Kan nakaagi kong pagdalaw, ipinaheling ko saindo an sarong artikulo sa An Torrengbantayan (o Awake!) na nakatabang sato na pahalagahan an pangangaipo na siyasaton an Biblia. An katuyohan nin Dios na sarong mas marahay na ngapit para sa katawohan nakasentro sa gobyerno kan saiyang Kahadean. Nagsasabi sato an Miqueas 4:3, 4 na tatapuson kan Kahadean na ini an gabos na guerra.” Pakabasa kan teksto, iintrodusir an brochure na “Uya!,” asin ipaheling an ilustrasyon sa tutob. Pag-olayan an enot na parapo asin an sitadong mga teksto, na sinasabi na an Miqueas 4:3, 4 saro sa mga iyan. Areglaron an pagdalaw liwat sa pagpadagos kan pag-orolay sa parapo 2.
3 Kun an interes kan kagharong garo baga kadikit sana o mayo siang panahon na makipag-olay, puwede kamong magdesisyon na idugang an saiyang ngaran sa saindong ruta sa magasin:
◼ “Mantang ipinahayag nindo an interes sa mga magasin na iwinalat ko saindo kan nakaagi, inisip ko na maoogma kamo sa pinakahuring mga luwas. Naniniwala ako na manonompongan nindo na partikularmenteng interesante an artikulong ini.” Itokdo an sarong artikulo na namamatean nindong makakaakit sa saiya. Sabihon na mabalik kamo na dara an masunod na mga luwas.
4 Kun an kagharong binasa an mga magasin asin nagpahayag nin apresasyon para dian, puwede kamong magdesisyon na ialok an suskripsion:
◼ “Mantang garo baga naoogma kamo sa An Torrengbantayan, naogma akong darahon an pinakahuring mga isyu sa pagluwas kaiyan. Kun gusto nindo, aareglaron ko na iyan ikapadara saindo nin regular paagi sa koreo tanganing makasierto kamo na makakua kan kada luwas.”
5 Kun nakapasakamot kamo nin brochure pero dai nagkaigwa nin oportunidad na idemonstrar an areglo sa pag-adal, planohon na gibohon iyan sa pagdalaw liwat.
Halimbawa, kun iwinalat nindo an brochure na “Government,” hagadon sa kagharong na kuanon an saiyang kopya asin magsabing:
◼ “Mangnoha digdi sa pahina 3 kun ano an sinasabi kaiyan sa sato manongod sa tema kan mensahe na ihinulit ni Jesus kan sia yaon pa digdi sa daga.” Dangan basahon an enot na parapo. Imbitaran sia na basahon an parapo 2 asin 3, asin hapoton sia kun ano an hinohona niang kaipuhan niang gibohon tanganing orog pang makanood. Dangan magsabing: “Boot kong bumalik asin ipakipag-olay kun taano ta kaipuhan tang maglaom sa pamamahala nin Dios bilang an solamenteng paglaom niato.”
6 Igwa kita nin manlaenlaen na brochure. Hanapon an interesanteng mga punto sa saro na pinaplano nindong gamiton. Tatabangan kamo kaiyan na pakosogon an mga sinsero na orog pang makanood manongod sa mga bagay na ipinagboot ni Jesus.—Mat. 28:20.