Matakot ki Jehova sa Bilog na Aldaw
1 “An pagkatakot ki Jehova iyo an kapinonan nin kadonongan.” (Sal. 111:10) Pinahihiro kita kaiyan na gumibo nin marahay asin tinatabangan kita na rumayo sa maraot. (Tal. 16:6) An pagkatakot na ini sarong hararom na reberensia para sa satong Kaglalang, na pinahihiro kita na likayan an pagpaanggot asin pakisuway sa saiya. Iyan sarong bagay na kaipuhan niatong kultibaron asin ipaheling sa bilog na aldaw.—Tal. 8:13.
2 Sa gabos na aldaw, an espiritu kan kinaban ni Satanas makosogon na iniimpluwensiahan kita na sumunod sa maraot na mga dalan kaiyan. (Efe. 6:11, 12) An satong bakong sangkap na laman makasalan asin naturalmenteng may tendensia pasiring sa maraot. (Gal. 5:17) Huli kaini, tangani na makuyog an mga togon ni Jehova, magin maogma, asin magkamit nin buhay, dapat kitang matakot sa saiya sa bilog na aldaw.—Deut. 10:12, 13.
3 Sa Hebreo 10:24, 25, sinasadol kita na magtorotiripon tanganing magparinigonan nin boot “lalo na” durante kaining mga panahon na nabubuhayan niato. Mahalagang marhay an regular na pag-atender sa mga pagtiripon tangani na kita maligtas sa huring mga aldaw na ini. An satong pagkatakot na mapaanggot an Dios nagpapahiro sa sato na umatender sa mga pagtiripon asin pahalagahan nin labi-labi an katuyohan kaiyan. An mga natatakot sa Dios ibinibilang an pakikikabtang sa Kristianong mga pagtiripon na sarong sagradong pribilehio.
4 An pagsunod sa pagboot na ihulit an maogmang bareta kan Kahadean saro pang paagi na ipinaheheling niato an satong pagkatakot sa Dios. (Mat. 28:19, 20; Gibo 10:42) An sarong pangenot na pasohan kan satong paghuhulit iyo na tabangan an iba na kultibaron an pagkatakot ki Jehova asin magpasakop sa saiyang kabotan. Ginigibo niato ini paagi sa mga pagdalaw liwat, paghihingoang makapoon nin mga pag-adal sa Biblia, dangan pagtokdo sa iba kan gabos na togon nin Dios. Paagi kaiyan, ipinaheheling niato an satong pagkatakot ki Jehova asin an satong pagkamoot sa kataed.—Mat. 22:37-39.
5 An mga dai natatakot sa Dios dai nakapatatalubo nin mapag-apresyar na aktitud sa espirituwal na mga bagay, asin sinda napadadara sa nakagagadan na doros kan kinaban, o mental na aktitud. (Efe. 2:2) Logod na an satong marigon na desisyon iyo na ‘magtao sa Dios nin sagradong paglilingkod na may diosnon na takot asin paghanga.’ (Heb. 12:28) Sa siring, aanihon niato an mga bendisyon sa mga natatakot ki Jehova sa bilog na aldaw.