Minomotibar Kita nin Pagkamoot na Maghulit
1 Bilang Mga Saksi ni Jehova, kita midbid na marhay sa pagigin maigot na mga parahulit kan mensahe nin Kahadean. (Mat. 24:14) Labing sais milyon an aktibo sa bilog na kinaban; nadadagdag an mga bagohan kun sinda nakikiiba sa sato sa paghuhulit. Kinokompilar an kabilangan basado sa pakikikabtang sa gibohon na ini.
2 Ano an nagmomotibar sa sato na magboluntaryo para sa siring na depisil na asignasyon? Kita dai napipiritan, naaakit nin materyal na ganansia, o inaalok nin espesyal na mga onra. Kan enot, dakol sa sato an natakot huli ta paghona niato kita bakong kualipikado, asin parateng negatibo an reaksion kan publiko. (Mat. 24:9) Kadaklan sa mga nagmamasid dai nasasabotan kun ano an nagmomotibar sa sato. Seguradong igwa nin mapuersang dahelan tangani na kita magmaigot.
3 An Puersa nin Pagkamoot: Ipinaaram ni Jesus an pinakadakula sa gabos na pagboot kan sia magsabi na satong ‘kamotan si Jehova sa bilog niatong puso, kalag, isip, asin kosog.’ (Mar. 12:30) An satong pagkamoot ki Jehova nakagamot sa hararom na mga pagmate nin pag-apresyar sa kun siisay asin ano sia—an Soberanong Namamahala, an Kaglalang kan gabos na bagay, na ‘maninigo na mag-ako kan kamurawayan, onra, asin kapangyarihan.’ (Kap. 4:11) Dai ikakokomparar an makangangalas na mga kualidad nia.—Ex. 34:6, 7.
4 An pakamidbid asin pagkamoot ki Jehova nagpapahiro sa sato na pasirangon an satong liwanag sa atubangan nin mga tawo. (Mat. 5:16) Nagsisirang an satong liwanag kun sia inoomaw niato sa publiko, nagtataram manongod sa saiyang makangangalas na mga gibo, asin pinalalakop an mensahe manongod sa Kahadean nia. Siring man sana kan anghel sa tahaw kan langit, igwa kita nin “daing katapusan na maogmang bareta na ipahahayag bilang nakaoogmang notisya . . . sa lambang nasyon asin tribo asin tataramon patin banwaan.” (Kap. 14:6) An pagkamoot niato an puersa na nasa likod kan gibohon na paghuhulit sa bilog na kinaban.
5 Sa pagheling kan kinaban an satong paghuhulit “karungawan” na maninigong ignorohon. (1 Cor. 1:18) Ginibo na an lakop na mga paghihingoa tangani na olangon an satong gibohon. Pinakosog kita kan satong maimbod na pagkamoot na magpahayag, siring kan mga apostol: “Dai kami puedeng mag-ontok sa pagtaram dapit sa mga bagay na samong naheling asin nadangog. . . . Dapat na kuyogon niamo an Dios bilang namamahala imbes na mga tawo.” (Gibo 4:20; 5:29) Padagos na naghihiwas an gibohon na paghuhulit sa gabos na parte kan daga sa ibong kan pagtumang.
6 An satong pagkamoot ki Jehova kaagid nin naglalaad na kalayo na nagpapahiro sa sato na ipahayag nin mahiwas an saiyang mga kamurawayan. (Jer. 20:9; 1 Ped. 2:9) Padagos niatong ‘ipaaaram sa mga banwaan an saiyang mga ginibo huli ta sia naggibo nin mga bagay na daing kaagid’!—Isa. 12:4, 5.