Tabangan an Iba na Umatender sa mga Pagtiripon
1 “An siisay man na katood sa palibot . . . na mawot na umatender sa mga pagtiripon may init na iniimbitaran na gibohon iyan.” Poon pa kan lumataw an paising ini sa luwas kan Zion’s Watch Tower na Nobyembre 1880 an Mga Saksi ni Jehova galagang nag-imbitar sa mga tawo na iribang magtiripon para sa pagtotokdo sa Biblia. (Kap. 22:17) Ini mahalagang marhay na kabtang nin tunay na pagsamba.
2 Mahalagang Marhay na Umatender: Nagbubunga nin mga bendisyon kun kita nakikiasosyar sa kongregasyon. Kita nagigin orog na pamilyar sa satong makangangalas na Dios, si Jehova. Sa kongregasyon, kita nagtitiripon tangani na ‘tokdoan ni Jehova.’ (Isa. 54:13) An saiyang organisasyon nagtatao nin dagos-dagos na programa nin pagtotokdo sa Biblia na orog na pinadadayupot kita sa saiya asin nagtatao nin praktikal na tabang sa pag-aplikar kan “gabos na sadol nin Dios.” (Gibo 20:27; Luc. 12:42) An mga pagtiripon nagtatao nin personal na pagsasanay sa teknika sa pagtotokdo kan Tataramon nin Dios. Tinatabangan kita kan mga pagirumdom hale sa Kasuratan na magkaigwa nin mapangganang relasyon sa iba asin ki Jehova mismo. An pakikiasosyar sa mga namomoot sa Dios nagpapakosog sa satong pagtubod.—Roma 1:11, 12.
3 Magtao nin Direktang Imbitasyon: Poon sa enot na pag-adal, imbitaran sa mga pagtiripon an lambang inaadalan sa Biblia. Tawan sia nin handbill. Pukawon an interes nia paagi sa paghiras nin sarong punto gikan sa nakaaging pagtiripon na nakaparigon sa boot nindo asin paagi sa pagkonsiderar sa sarong bagay na totokaron sa masunod na pagtiripon. Iladawan kun ano an itsura kan Kingdom Hall, asin seguradohon na aram nia kun paano iyan hahanapon.
4 Kun dai tolos umatender an inaadalan, padagos na imbitaran sia. Gumamit nin pirang minuto kada semana sa pagpaheling sa saiya kun paano nagpupunsionar an satong organisasyon. Gamiton an brosyur na Nag-ootob sa Kabotan nin Dios asin an video na Jehovah’s Witnesses—The Organization Behind the Name tangani na sia magin pamilyar sa sato asin sa satong mga pagtiripon. Ipag-iba an iba pang parahayag tangani na makamidbid sinda kan inaadalan. Sa pamibi, pasalamatan si Jehova para sa organisasyon asin sambiton an pangangaipo kan inaadalan na makiasosyar dian.
5 Dai mag-alangan na tabangan an bagong mga interesado na makipagtipon sa sato. Mantang nagtatalubo an saindang pag-apresyar ki Jehova, sinda mapahihirong iaplikar an saindang nanonodan asin magin kabtang kan nagkakasararong organisasyon nin Dios.—1 Cor. 14:25.