Mga Kombension—Panahon Para sa Paggayagaya!
1 An mga kombension kan Mga Saksi ni Jehova mga okasyon nin dakulang paggayagaya. Sa labi nang sanggatos na taon, an mga pagtiripon na ini nakakontribwir sa pag-oswag na nangyayari sa satong organisasyon. Poon sa saradit na kapinonan, naheling niato an nagsosopay na mga bendisyon ni Jehova sa gibohon niato sa bilog na kinaban. Sa satong kaenot-enoteng kombension sa presenteng mga panahon, sa Chicago, Illinois, kan 1893, may total na 70 sa 360 nag-atender an nabautismohan bilang simbolo kan saindang pagdusay ki Jehova. An serye kan “Mga Paraotob kan Tataramon nin Dios” na Pandistritong mga Kombension kaining nakaaging taon nagkaigwa nin total na nag-atender sa bilog na kinaban na 9,454,055, na may 129,367 nabautismohan. Abaa karahay na dahelan para sa paggayagaya!
2 Poon kan mga panahon kan Biblia, an mga pagtiripon kan banwaan nin Dios nagin lataw na mga paagi nin pagtao nin pagtotokdo hale ki Jehova. Sa panahon ni Esdras asin Nehemias, naghinanyog an banwaan sa pagbasa kan Ley “poon sa amay na aga sagkod sa odto.” (Neh. 8:2, 3) Huli ta orog na nasabotan an Ley sa okasyon na idto, nakaeksperyensia an banwaan nin “dakulang kagayagayahan.” (Neh. 8:8, 12) Kita man naggagayagaya na an mga kombension nagtatao nin marahay na oportunidad sa sato na mag-ako nin marahay na pagtotokdo asin espirituwal na kakanon “sa igong panahon” hale ki Jehova paagi sa “fiel asin may diskresion na oripon.” (Mat. 24:45) Mantang nagsabi si Jesus na an tawo dapat na mabuhay sa “lambang tataramon na minaluwas sa ngoso ni Jehova,” mahalagang marhay an mga kombension para sa satong espirituwal na ikararahay.—Mat. 4:4.
3 Bawi Man an Gabos na Paghihingoa na Umatender: Kita gabos maninigong gibohon na personal na pasohan niato na magin presente sa bilog na “Mga Paratokdo kan Tataramon nin Dios” na Pandistritong Kombension ngonyan na taon. Maninigong planohon niatong umabot nin amay kada aldaw asin magdanay sagkod na umayon kita sa pagsabing “Amen!” sa pantapos na pamibi. Tangani na magibo ini tibaad kaipuhan niatong areglaron an iskedyul niato. An pagbakasyon sa trabaho niato tangani na makaatender sa kombension tibaad mag-atubang nin nagkapirang problema. Kaipuhan niatong manindogan nin marigon, na dai ipinagkakanorongod na sana an ano man na bagay. Kun kaipuhan niato nin mga dadagosan asin/o malulunadan, maninigo na kita gumibo nin mga areglo na amay pa. Ano man na paghihingoang gigibohon niato magigin bawi man!
4 Dai sinosokol kan banwaan ni Jehova an mga bendisyon sa pag-atender sa kombension paagi sa kuarta. Mangnoha an mga halimbawa nin nagkapira na determinadong umatender sa 1958 Kabotan nin Dios na Internasyonal na Asamblea kan mga Saksi ni Jehova sa Siudad nin Nueva York. Isinera nin sarong tugang na lalaki an saiyang negosyong konstruksion sa laog nin duwang semana tangani na sia makapagboluntaryong tumabang asin umatender sa asamblea. Ipinabakal nin sarong tugang na lalaki sa Virgin Islands an duwang ektarya nin daga tanganing makaatender an bilog niang pamilya na may anom na miembro. Ipinabakal nin hoben pang mag-agom an saindang barotong de-motor tanganing ikaiba ninda sa asamblea an gabos na tolong aki ninda na an mga edad duwang bulan sagkod pitong taon. Sinabihan an tolong magturugang na lalaki na taga California na kun mayo sinda sa saindang mga trabaho, an mga trabahong idto mayo na pagbalik ninda. Minsan siring, dai iyan nakapogol sa sainda sa pagduman sa dai malilingawan na asambleang idto.
5 Binabalosan ni Jehova an Odok na Paghihingoa Niato: Naheheling asin binebendisyonan ni Jehova an mga paghihingoa kan saiyang banwaan. (Heb. 6:10) Bilang halimbawa, sa 1950 Pag-oswag kan Teokrasya na Asamblea, an mga nag-atender naghinanyog kan dai malilingawan na pahayag na “Bagong Sistema nin mga Bagay.” Pinukaw asin inanimar ni Tugang na Frederick Franz an interes kan gabos paagi sa paghapot: “Maoogma daw an internasyonal na katiriponan na ini na maaraman na digdi, ngonyan na banggi, sa tahaw niato, igwa nin dakol na may esperansang magin prinsipe sa bagong daga?” Pakalihis nin 50 taon, kita naggagayagaya pa man giraray sa klinaripikar na pakasabot na ini sa Salmo 45:16.
6 Pakaatender sa pandistritong kombension kan nakaaging taon, an sarong mapag-apresyar na payo nin pamilya nagsurat kan minasunod: “Mga tugang, dai nindo aram kun gurano kanakapagliligtas-buhay an kombension na ini. Nagbalyo an pamilya ko sa siudad huli sa trabaho, tangani sanang madiskobre na nadedepisilan an samong espirituwalidad. . . . Napabayaan mi an samong Kristianong mga obligasyon. Biyo pa ngani kaming nagpondo sa pag-atender sa mga pagtiripon asin pakikikabtang sa paglilingkod. . . . Pinakosog kami kan kombension na ini, asin sa giraray nagbubugtak na kami nin espirituwal na mga pasohan asin nag-oorganisar tangani na magibo ini.”
7 Sinusuplayan kita ni Jehova nin espirituwal na kakanon na kaipuhan niato. Nagpupuesto sia nin nagsosopay na kakanon sa mga kombension niato. An satong pagpahalaga sa probisyon na ini maninigong magpangyari sa sato na sabihon an sinabi ni Cornelio kan sia dalawon ni apostol Pedro: “Sa panahon na ini uya kami gabos sa atubangan nin Dios sa pagdangog kan gabos na bagay na ipinagboot sa saimo ni Jehova na sabihon.” (Gibo 10:33) Gibohon niatong pasohan niato na magin ‘uya sa atubangan nin Dios’ sa gabos na sesyon kan “Mga Paratokdo kan Tataramon nin Dios” na Pandistritong Kombension ngonyan na taon asin maggayagaya!