Taroson an Puso kan Inaadalan Nindo
1 Bago sumakat sa langit, sinabihan ni Jesus an saiyang mga disipulo na tokdoan an iba na “otobon” an gabos na bagay na ipinagboot nia. (Mat. 28:19, 20) Tanganing ‘maotob’ nin saro an mga pagboot ni Cristo, dapat na makataros an impormasyon sa puso nia. (Sal. 119:112) Paano nindo matataros an puso nin saro na inaadalan nindo sa Biblia?
2 Mamibi Para sa Paggiya ni Jehova: An paggibo nin mga disipulo gibohon nin Dios. An bendisyon nia, bakong an satong mga abilidad, an kaipuhan para sa kapangganahan. (Gibo 16:14; 1 Cor. 3:7) Sa siring, mahalagang marhay an pagpamibi para sa tabang ni Jehova sa pagtotokdo kan katotoohan sa iba.—Isa. 50:4.
3 Mansayon Kun Ano an Pinaniniwalaan kan Inaadalan: An pakaaram sa kun ano an pinaniniwalaan nin mga tawo asin kun taano ta pinaniniwalaan ninda iyan makatatao sa sato nin pakarorop sa kun ano an sasabihon tangani na mataros an puso ninda. Taano daw an inaadalan ta naaakit sa sarong partikular na katokdoan? Ano an nakakombensir sa saiya na iyan kapanipaniwala? An siring na kaaraman makatatabang sa sato na magtaram na may pakarorop.—Gibo 17:22, 23.
4 Gumibo nin Sarong Lohiko, Sono sa Kasuratan na Argumento: Dapat na masabotan kan inaadalan an katotoohan. (Gibo 17:24-31) Dapat kitang magtao nin marahay na dahelan para sa satong paglaom. (1 Ped. 3:15) Minsan siring, pirmeng gibohon iyan sa maboot, mapasensiang paagi.
5 Idoon Iyan Paagi sa mga Ilustrasyon: Bako sanang nakakokontribwir an mga ilustrasyon na mas madaling makasabot an inaadalan kundi pinupukaw man kaiyan an emosyon. Apektado kaiyan an isip sagkod an puso. Parate iyan na ginamit ni Jesus. (Mar. 4:33, 34) Siempre, tangani na magin epektibo, an ilustrasyon na ginagamit dapat na bagay sa puntong pinag-oolayan, asin iyan maninigong konektado sa buhay kan inaadalan.
6 Ipaheling an mga Pakinabang sa Pag-ako kan Katotoohan: Gustong maaraman nin mga tawo an mga pakinabang kan pag-aplikar sa nanonodan ninda. Tabangan an inaadalan nindo na masabotan an kadonongan kan mga tataramon ni Pablo sa 2 Timoteo 3:14-17.
7 Dai manluya an boot kun may nagkapira na dai naghihimate sa pagtotokdo nindo. Bakong gabos na puso andam na umako. (Mat. 13:15) Minsan siring, may mga indibiduwal na talagang nagtuturubod. (Gibo 17:32-34) Logod na an mga paghihingoa nindong taroson kan maogmang bareta an mga puso makatabang sa dakol pa na akoon asin “otobon” an pagboot ni Jesus.