Iinaaplikar daw Nindo an Saindong Nanodan sa “Mga Paratokdo kan Tataramon nin Dios” na Pandistritong Kombension?
1 An siisay man na nag-atender sa pandistritong kombension ngonyan na taon naheheling na an banwaan ni Jehova desididong otobon an sugo sa sainda na magin mga paratokdo kan Tataramon nin Dios. (Mat. 28:19, 20) Pagpuli nindo, anong espesipikong mga punto nin pagtotokdo an determinado kamong iaplikar sa saindo mismong buhay asin sa ministeryo sa langtad?
2 An Ipinasabong na Kasuratan Kapakipakinabang Para sa Pagtotokdo: An tema kan enot na aldaw itinampok an 2 Timoteo 3:16. Ipinaheling kan pahayag sa pinakatema na tanganing magin “Biyong Nasangkapan Bilang mga Paratokdo kan Tataramon nin Dios,” dapat na igalang tang marhay an Tataramon nin Dios, irespeto iyan nin orog kisa ano pa man na opinyon o tradisyon nin tawo, asin pirmeng gamiton iyan. Dapat man kitang mamibi aroaldaw para sa banal na espiritu na logod tabangan kita sa satong ministeryo asin maghingoa na kultibaron an pangenot na bunga kaiyan—an pagkamoot. Asin dapat na togotan niato an daganon na organisasyon ni Jehova na sanayon kita bilang mga ministro paagi sa gabos na pagtiripon kan kongregasyon.
3 An simposium kan Biernes, na “Tinotokdoan an Satong Sadiri Mantang Tinotokdoan an Iba,” nagpaliwanag na dapat kitang magin arogan sa (1) pagsusog sa mga ley nin Dios sa gabos na kabtang nin Kristianong moralidad, 2) pagpapadanay nin mahigos na ugale sa pag-adal, asin (3) paghale kan mga aktitud asin kamugtakan kan puso asin isip na puedeng aprobetsaran kan Diablo. Sunod, nanodan niato an praktikal na mga paagi na maprotehir sa satong mga pamilya sa kinabanon na damat nin pornograpiya. Sinadol an mga magurang na magtao nin halimbawa sa paglikay dawa sa pagsalimbad sa sarong seksuwal na eksena asin na bantayan an saindang mga aki sa paggamit nin Internet asin pagdalan sa telebisyon. Anong mga punto sa programa kan Biernes an pinonan na nindong iaplikar?
4 An huring pahayag kan aldaw nakadagdag sa satong desisyon na pakamahalon an liwanag ni Jehova, magdanay na dayupot sa grupong fiel na linahidan nin Dios, asin magkontribwir para sa katoninongan kan banwaan ni Jehova. Nabasa na daw nindo an bagong luwas na Isaiah’s Prophecy—Light for All Mankind II?
5 Kualipikadong Marhay na Magtokdo sa Iba: An pinakatemang teksto para sa ikaduwang aldaw iyo an 2 Timoteo 2:2. Mantang naghihinanyog kamo sa simposium kan Sabadong aga, isinurat daw nindo an mga suhestion sa kun paano (1) hahanapon an mga maninigo, (2) kukultibaron an saindang interes, asin (3) totokdoan sinda na kuyogon an gabos na ipinagboot ni Cristo? Iinaaplikar daw nindo an saindong nanodan—na ipaheling sa mga kagharong kisuerra an sarong punto hale sa Kasuratan asin na ibugtak an pundasyon para sa masunod na pagdalaw?
6 Idinoon kan programa kan hapon an importansia nin pag-arog sa Dakulang Paratokdo, si Jesus. Sa anong mga paagi na hinihingoa nindong orog na magin arog nia? Sa saindong nanodan sa ikaduwang simposium kan aldaw na iyan, sa pagmate nindo paano kamo puedeng “Makinabang nin Lubos sa Teokratikong Edukasyon”? Anong mga suhestion an iinaplikar nindo tangani na madugangan an saindong lawig nin oras na makakonsentrar durante nin personal na pag-adal asin mga pagtiripon kan kongregasyon?
7 Mayong duwa-duwa na an maabot na probisyon na Makinabang nin Lubos sa Edukasyon sa Teokratikong Paadalan sa Pagmiministro makatatabang sa sato na pataluboon an satong mga abilidad bilang mga nagpapahayag asin bilang mga paratokdo kan Tataramon nin Dios. Itatao an orog na atension sa mga kualidad sa pagtaram na nagpapamidbid sa fiel na mga lingkod nin Dios kaidtong mga panahon kan Biblia. An lambang leksion sa bagong aadalan na libro igwa nin mga kahon na deretso sa puntong nagpapaheling kun ano an kaipuhan niatong gibohon, kun taano iyan ta importante, asin kun paano iyan gigibohon. Kaiba an praktikal na mga pagpraktis. An mga tugang na babae magkakaigwa nin 29 eksena na mapagpipilian kun matao kan saindang mga asignasyon. Pag-abot nin panahon, an iinanunsiar na mga pagbabago gigibohon sa areglo kan paadalan. Igwa daw kamo nin marahay na pinagkatodan sa pag-adal asin pag-andam tanganing makinabang nin lubos sa Teokratikong Paadalan sa Pagmiministro kada semana?
8 Magin mga Paratokdo Huli sa Panahon: Iinandam kan Hebreo 5:12 an isip kan mga nagdadangog para sa Domingo. Sinadol kita kan simposium kan aga, “An Hula ni Malaquias Iinaandam Kita Para sa Aldaw ni Jehova,” na itao sa Dios an satong pinakamakakaya asin na kaongisan an gabos na klase nin pandadaya tanganing kita maligtas sa dakula asin makangingirhat na aldaw ni Jehova. An drama, na “Igalang an Autoridad ni Jehova,” mapuersang nagpaheling kun paano an kapalangkawan, ambisyon, pag-imon, asin napasalang kaimbodan kan suanoy na si Core asin kan saiyang kairiba nagbunga nin mga gibo nin direktang pagrebelde tumang ki Jehova mismo. An suminunod na pahayag nagkonsentrar sa pangangaipo sa presenteng aldaw na magpasakop sa diosnon na autoridad sa laog kan pamilya asin kan kongregasyon. An pampublikong diskurso, na “Siisay an Nagtotokdo sa Gabos na Nasyon kan Katotoohan?,” nagtao nin prueba na an Mga Saksi ni Jehova an naggigibo kaiyan, kabaliktaran sa Kakristianohan, na naghihingako sanang nagtotokdo kan katotoohan sa Biblia.
9 Malinaw nanggad na sinasanay kita ni Jehova na magin mas marahay na mga paratokdo kan saiyang Tataramon. Iaplikar niato an satong nanodan, na ‘pirmeng atenderan an sato man sana asin an satong pagtotokdo, tangani na iligtas an sato man sana sagkod idtong naghihinanyog sa sato.’—1 Tim. 4:16.