Gurano Katama kan Pagkakan Nindo sa Espirituwal?
1 May kasabihan na ‘an satong salud apektado kan satong kinakakan.’ Tunay nanggad na an satong pisikal na kosog asin salud apektado kan satong ugale sa pagkakan. Huling sinabi ni Jesus: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova,” an satong ugale sa pagkakan sa espirituwal nakaaapektar man sa sato sa ikararahay o ikararaot. (Mat. 4:4) Kun siring, gurano katama kan pagkakan nindo sa espirituwal? Kamo daw mapili sa pagkakan? Kamo daw naghihidale sa pagkakan? O ikinaoogma daw nindong marhay na tawan nin panahon an pagkakan nin regular, timbang, asin masustansiang espirituwal na kakanon?
2 Analisaron an Saindong Pagkakan: Si Jehova nagtatao nin “kakanon sa igong panahon” asin “bangkete nin matatabang putahe,” paagi sa “fiel asin may diskresion na oripon.” (Mat. 24:45; Isa. 25:6) Tangani na makinabang nin lubos sa mamomoton na mga probisyon na ini, dapat kitang maghingoa nanggad na kumakan nin tama sa espirituwal.
3 Puede nindong hapoton an sadiri nindo: ‘Binabasa ko daw aroaldaw an teksto asin mga komento kan aldaw? Binabasa asin hinohorophorop ko daw an Biblia aroaldaw? Nag-aandam daw ako para sa mga pagtiripon kan kongregasyon paagi sa patienot na pag-adal kan materyales? Tapos ko na daw na basahon an pinakabagong mga publikasyon, kabale an Isaiah’s Prophecy—Light for All Mankind?’
4 Nanuga si Jesus: “Maogma idtong mga nakamamate kan saindang espirituwal na pangangaipo . . . Maogma an mga nagugutom asin napapaha sa katanosan, huli ta sinda mababasog.” (Mat. 5:3, 6) Kaya magkakan nin tama paagi sa pagpano sa saindong isip asin puso kan kaaraman nin Dios.