Likayan an Pagmamaigot na Magkamit nin “mga Bagay na Daing Kamanungdanan”
1 An sarong popular na paagi nin komunikasyon ngonyan iyo an E-mail. Minsan ngani tibaad tama man an pagpaabot nin personal na mga eksperyensia asin ideya sa mga kapamilya asin katood sa paaging ini, anong “mga bagay na daing kamanungdanan” an ikakokonektar sa daing limitasyon na paggamit nin E-mail?—Tal. 12:11.
2 Mga Patanid Mapadapit sa E-Mail: An nagkapira nagsasabi na an pagmate ninda mas harani sinda sa organisasyon ni Jehova kun sinda nakareresibi nin ibinibilang nindang bagong impormasyon paagi sa E-mail. Tibaad kabale digdi an mga eksperyensia, mga nota manongod sa mga nangyayari sa Bethel, mga bareta manongod sa mga kalamidad o paglamag, asin pati kompidensial na impormasyon na ilinuwas sa mga Pankahadean na Paadalan sa Pagmiministro. An iba garo baga sobra kagalaga na magpadara nin siring na mga mensahe, na naglalaom na iyo an maenot sa paghayag kan impormasyon sa saindang mga katood.
3 Kun beses, an impormasyon asin mga eksperyensia biniribid an kahulogan o pinasobrahan. O tibaad sa paghihingoa na mangulat, an nagkapira nakatao nin impresyon na bakong totoo. An mga naghuhumari sa paghayag nin siring na mga bagay sa parate dai aram an gabos na detalye. (Tal. 29:20) Sa nagkapirang pangyayari, dawa kun dai mapaniwalaan an sarong estorya, iyan ipinapasa bilang interesanteng burobareta. An siring na sala o nanlalagalag na mga bareta nagigin “falsong mga estorya,” na dai nagpapalakop nin tunay na diosnon na debosyon.—1 Tim. 4:6, 7.
4 Kun nagpapasa kamo nin impormasyon na sala palan, may paninimbagan kamo sa kamondoan asin karibarawan na puedeng magin resulta kaini. Kan maresibi ni David an pinasobrahan na bareta na ginadan an gabos niang aki, saiyang “pinasing an saiyang gubing” huli sa labi-labing kamondoan. Minsan siring, an totoo, saro sana sa saiyang mga aki an nagadan. Igo nang makapamondo idto, alagad an pagpasobrang ini nagtao ki David nin dagdag na kamondoan. (2 Sam. 13:30-33) Segurado na habo niatong gumibo nin ano man na makalalagalag o makapaluluya kan boot nin siisay man na tugang niato.
5 An Nombrado nin Dios na Pinakapaagihan: Girumdomon na an satong langitnon na Ama igwa nin nombradong pinakapaagihan nin komunikasyon, “an fiel asin may diskresion na oripon.” An “oripon” na iyan may paninimbagan na determinaran kun anong impormasyon an itatao sa kapamilya sa pagtubod, saka an “igong panahon” na iyan itatao. Makukua sana an espirituwal na kakanon na ini paagi sa teokratikong organisasyon. Maninigo na kita pirmeng umasa sa nombrado nin Dios na pinakapaagihan para sa masasarigan na impormasyon, bakong sa magkakakonektar na mga naggagamit nin Internet.—Mat. 24:45.
6 Mga Web Site sa Internet: Igwa kita nin opisyal na Web site sa Internet: www.watchtower.org. An site na ini igo sa pagtao nin impormasyon sa publiko. Dai na kaipuhan an siisay man na indibiduwal, komite, o kongregasyon na mag-andam pa nin Web page manongod sa Mga Saksi ni Jehova. May mga nagbugtak kan mga laog kan satong mga publikasyon na kompleto sa teksto asin reperensia saka nag-alok pa ngani nin kopya kan mga pahayag sa kombension karibay nin donasyon. Baga man may kalabot na ganansia o mayo, an pagreprodusir asin pagdistribwir kan mga publikasyon kan Mga Saksi ni Jehova paagi sa elektronikong dokumento sarong pagbalga sa mga ley sa deretsong magpublikar. Minsan ngani tibaad minamansay ini nin iba na paglilingkod sa mga tugang, iyan dai inooyonan asin maninigong ipondo.
7 Seseguradohon nin paggamit nin marahay na paghusgar asin marahay na kaisipan kun naggagamit nin elektronikong komunikasyon na an satong isip mapano nin “mahal na marhay asin marahay na mga bagay na mahalaga.”—Tal. 24:4.