Maogmang Bareta sa Internet

Sa satong panahon, may mga tawo na nagkukua nin impormasyon sa elektronikong mga gikanan. Kaya an Sosyedad nagbugtak sa Internet nin tamang impormasyon manongod sa mga paniniwala asin aktibidad kan Mga Saksi ni Jehova.

An satong Internet Web site may adres na http://www.watchtower.org asin igwa nin piniling mga pulyeto, brosyur, asin mga artikulo sa Watchtower asin Awake! sa Ingles patin iba pang mga lenguahe. An mga publikasyon sa Web site na ini makukua na paagi sa mga kongregasyon asin ginagamit na sa ministeryo. Katuyohan kan satong Web site na makua kan publiko an impormasyon paagi sa elektronikong porma. Dai na kaipuhan nin siisay man na indibiduwal na magpreparar nin Internet pages dapit sa Mga Saksi ni Jehova, sa satong mga aktibidad, o sa satong mga paniniwala. An satong opisyal na site nagtatao nin tamang impormasyon sa siisay man na gusto kaiyan.

Minsan ngani an satong site mayong probisyon para sa elektronikong mga mensahe (E-mail), may mga lista iyan nin adres sa koreo kan mga sangang opisina kan Sosyedad sa bilog na globo. Sa siring puedeng sumurat an mga tawo tangani na makakua nin orog pang impormasyon o mag-ako nin personal na tabang sa lokal na mga Saksi. Puede nindong ihiras nin suelto an nasambitan na adres kan Internet sa siisay man na tibaad may inklinasyon na pumoon na mag-adal kan katotoohan sa Biblia hale sa pormang ini.