Pagkinabang nin Lubos sa “Maigot na mga Parabalangibog kan Kahadean” na Pandistritong Kombension
1 Nagpapakosog na Programa: Kanigoan kanakaaanimar na programa an nakamtan niato sa satong nakaagi pa sanang pandistritong kombension! Kita nagtiripon sa sarong katuyohan, na orog na masangkapan na ibalangibog nin maigot an Kahadean nin Dios. Nagigirumdoman daw nindo kun paano tinawan nin kahulogan kan enot na ispiker an tataramon na “ibalangibog”? Nagigirumdoman daw nindo kun anong pagsiyasat an inenkaminar kita na gibohon sa pahayag na “Magin Daing Takot sa Pakaaram na si Jehova Nasa Sato”? Arin na mga estorya nin tunay na buhay an siniyasat na nindo sagkod ngonyan?
2 Itinao kan simposium na “An Kualidad kan Satong Pagtubod Nababalo Paagi sa Manlaenlaen na Pagbalo” an tolong pangenot na dahelan kun taano ta tinotogotan ni Jehova an paglamag. Puede daw nindong ipaliwanag kun ano an mga iyan? Ano an basehan sa Kasuratan kan satong Kristianong neutralidad? Tangani na andamon an satong sadiri sa mga angat sa satong neutral na paninindogan, inenkaminar kita na gibohon an ano? Paano an satong fiel na pagtagal sa mga pagbalo nagtataong kaomawan ki Jehova?
3 Arin na mga eksena sa dramang “Tumindog nin Marigon sa mga Panahon nin Kasakitan” an nangorognang nakapakosog sa saindo? Paano kita magigin siring ki Jeremias?
4 An pampublikong diskurso na, “An Kamugtakan kan Kinaban na Ini Nagbabago,” nagladawan nin anong makahulogan na mga pagbabago na mangyayari asin na masagkod sa makangingirhat na aldaw nin Dios? Mientras na naghihinanyog sa pantapos na pahayag na, “Magsopay sa Marahay na mga Gibo Bilang Maigot na mga Parabalangibog kan Kahadean,” paano nindo ikinonektar an impormasyon sa saindong personal na ministeryo?
5 Pangenot na mga Punto na Iaaplikar: Siring sa ipinaliwanag sa pahayag na “Ipaheling Nindo na Kamo Mapagpasalamat,” paano niato ikapahahayag an rarom kan satong pagpasalamat ki Jehova? Sa pahayag sa pinakatema na, “Naglalaad an Kaigotan kan mga Parabalangibog kan Kahadean,” kiisay na kaigotan an inenkaminar kita na arogon? Anong pagsiyasat sa sadiri an ipinagigibo sa sato?
6 An simposium na “An Hula ni Miqueas Nagpapakosog sa Sato na Maglakaw sa Ngaran ni Jehova” nagtampok nin anong tolong kahagadan na dapat na aboton niato tangani na mag-ako kan pabor ni Jehova? Maaabot daw an mga ini? (Miq. 6:8) Segun sa pahayag na “Papagdanayon an Kabinian Paagi sa Pag-iingat kan Saindong Puso,” sa anong mga paagi dapat kitang magdanay na malinig sa moral? An pahayag na “Magmaan sa Pandadaya” nagpapatanid sa sato na dai magpadaya asin dai mandaya sa iba sa anong mga bagay?
7 Anong praktikal na mga punto sa simposium na “Mga Parabalangibog kan Kahadean na Pinamumuraway an Saindang Ministeryo” an pinonan na nindong iaplikar sa saindong ministeryo? Sa pahayag na “An Pakikipag-olay sa Espirituwal Nakapakokosog,” siniyasat an Filipos 4:8. Paano nakatatabang sa sato an tekstong iyan tangani na magin espirituwal an satong mga pag-orolay, asin noarin niato iyan maninigong gibohon?
8 Tinokar kan pahayag na “Magtiwala nin Lubos ki Jehova sa mga Panahon nin Kapurisawan” kun paano niato makakayang atubangon an makaturotristeng mga pangyayari, mga kadepisilan sa pinansial, maluyang salud, mga problema sa pamilya, asin nagdadanay na mga kaluyahan. Paano kita makapaheheling nin pagtitiwala ki Jehova kun napapaatubang sa mga situwasyon na ini?
9 Bagong Espirituwal na mga Kayamanan: Naogma kitang marhay na akoon an bagong librong Worship the Only True God. Paano kamo naapektaran kan paisi na nagpapaliwanag kan katuyohan kaiyan? Taano ta makakatabang iyan bilang ikaduwang librong pag-aadalan sa satong paggibo nin mga disipulo?
10 Sunod inako niato an magayon na librong Rumani ki Jehova. Ano an nagkapira sa espesyal na mga kabtang kaiyan? Arin na mga ilustrasyon an espesyalmenteng nagugustohan nindo? An pagbasa daw nindo kaiyan orog kamong irinani ki Jehova? Siisay pa an puedeng makinabang dian?
11 An “Maigot na mga Parabalangibog kan Kahadean” na Pandistritong Kombension nagtao sa sato nin espirituwal na pagparigon sa boot na kaipuhan niato sa pag-atubang sa masakit na mga panahon na ini. Tanganing makinabang nin lubos sa marahayon na espirituwal na probisyon na ini, gibohon logod niato an satong pinakamakakaya na girumdomon an sinabi, apresyaron an inako niato, asin iaplikar an nanodan niato. (2 Ped. 3:14) An paggibo kaiyan mapakosog sa sato na papagdanayon an satong integridad asin magin maigot na mga parabalangibog kan Kahadean bilang pag-arog sa satong Kagurangnan na si Jesu-Cristo, an gabos para sa kamurawayan ni Jehova.—Fil. 1:9-11.