Odok na Pakiolay na Himateon an Warning Examples for Our Day
Puede niato gabos na pasarigon an satong determinasyon na papagdanayon an satong integridad paagi sa paghimate kan mga leksion na nanodan sa drama sa Biblia na ipinaheling sa video na Warning Examples for Our Day. Bago dalanon iyan, basahon tabi an Bilang kapitulo 25 asin an impormasyon sa Insight on the Scriptures, Tomo 2, pahina 419, parapo 3-5. Dangan simbagon an mga hapot na ini: Sairisay an mga Moabita, asin taano ta sinabihan ni Jehova si Moises na dai makipaglaban sa sainda? (Deut. 2:9) Paano nagpakana si Balaam na gamiton an mga Moabita tanganing laglagon an nasyon nin Israel? Taano ta dai niato maninigong paglingawan na dakol na Israelita an dai nakapasar sa sarong mahalagang marhay na pagbalo kan madali na sindang lumaog sa Dagang Panuga?—1 Cor. 10:11, 12.
Mantang nagdadalan kan video na Warning Examples, isip-isipon an minasunod na apat na kabtang nin buhay na dapat niatong tawan nin seryosong atension ngonyan kun gusto niatong magin fiel asin magkamit kan pabor nin Dios. (1) Aktitud: Paano nagpaheling an nagkapirang Israelita nin salang aktitud ki Jehova asin sa saiyang mga areglo? Imbes, anong aktitud an maninigo niatong pagmaigotan na ipaheling? (2) Pag-iriba: Taano ta habo ni Jehova na an mga Israelita magin katood kan mga Moabita? (Ex. 34:12; Tal. 13:20) Taano ta dapat niatong madonong na pilion an satong mga katood? (3) Moral na gawe-gawe: Sa anong grabeng kasalan dinara kan maraot na pag-iriba an mga 23,000 na Israelita? (1 Cor. 10:8) Ngonyan, ano an nakaakit sa nagkapira sa banwaan nin Dios na makakomiter nin inmoralidad, alagad paano niato puedeng protehiran an satong sadiri? (4) Pagsamba: Paano nabalo an mga Israelita kun manongod sa kadalisayan kan saindang pagsamba? Sa anong tusong klase nin idolatriya tibaad madara an nagkapira ngonyan, alagad paano niato iyan malilikayan?—Col. 3:5.
Sa drama, paano binendisyonan si Jamin huli sa saiyang moral na integridad? Paagi sa video na ini, ano an odok na pakiolay kan Namamahalang Grupo sa gabos na tunay na Kristiano? Kun kamo payo nin pamilya, taano ta sa pagmate nindo madonong na dalanon nin paorootro kan saindong pamilya an programang ini?