Sarong Video na Maninigong Pag-isipan nin Seryoso

¹ Nagkapirang taon na an nakaagi, sarong hoben na tugang na lalaki an nawaran nin interes sa katotoohan, asin nawara an saiyang relasyon ki Jehova huli sa impluwensia kan mga katood na saiyang pinili. Dangan ilinuwas an video na Young People Ask—How Can I Make Real Friends? Sia nagsurat: “Mantang paorootro kong dinadalan an video, napapahibi ako. Nagpasalamat ako ki Jehova para sa tabang na itinao sa tamang panahon.” An video nakamotibar sa saiya na bagohon an saiyang pamumuhay asin magkaigwa nin tamang klase nin mga katood. Idinugang nia: “Risang-risa na aram nindo an pinakabagong impormasyon manongod sa kun ano an nakakaapekto sa mga hoben.” Mga magurang asin hoben, taano ta dai dalanon giraray an video sa saindong sunod na pampamilyang pag-adal asin pag-olayan nin iriba an mga hapot sa minasunod na mga parapo?

² Introduksion: Ano an tunay na katood?—Tal. 18:24.

³ Mga Balakid sa Pakikikatood: Paano nindo madadaog an pakamate na dai kamo inaako? (Fil. 2:4) Taano ta dapat kamong magin andam na paoswagon an saindong personalidad, asin siisay an makakatabang sa saindo na gibohon iyan? Ano an makakabukas nin mga oportunidad tanganing magkaigwa kamo nin mas dakol na katood, asin saen sinda manonompongan?—2 Cor. 6:13.

⁴ Pakikikatood sa Dios: Paano kamo makakapatalubo nin mas dayupot na relasyon ki Jehova, asin taano ta bawi an paghihingoa sa paggibo nin siring? (Sal. 34:8) Siisay an pinakamarahay na makakapakosog kan saindong pakikikatood sa Dios?

⁵ An Salang Klase nin mga Katood: Sairisay an maraot na pag-iriba? (1 Cor. 15:33) Paano an bakong marahay na mga katood puedeng giyahan an saro pasiring sa espirituwal na kapahamakan? Ano an itinotokdo sa saindo kan pagkasaysay sa Biblia manongod ki Dina?—Gen. 34:1, 2, 7, 19.

⁶ Sarong Modernong Aldaw na Drama: Paano nakaapektar ki Tara an kamondoan? Paano nia ipinangatanosan an saiyang pakikiasosyar sa kinabanon na mga hoben? Ibinugtak ninda sia sa anong mga peligro? Taano ta dai narisa kan saiyang mga magurang an peligrong linaogan nia, alagad paagi sa anong aktitud na tinabangan ninda sia na marahayan sa espirituwal? Paano an sarong payunir na tugang na babae nagin tunay na katood para ki Tara? Taano ta dapat na himateon kan mga Kristiano an Talinhaga 13:20 asin Jeremias 17:9? Anong importanteng leksion an nanodan ni Tara?

⁷ Konklusyon: Anong mga leksion an nanodan nindo sa video na ini? Paano nindo iyan magagamit sa pagtabang sa iba?—Sal. 71:17.