Entusiastikong Reaksion!
1 An Kristianong mga pamilya sa gabos na lugar nagpahayag kan saindang entusiastikong pag-apresyar sa video na Young People Ask—How Can I Make Real Friends? An sarong ama sa Estados Unidos nagsabi na pakadalan kaiyan nagtukaw an saiyang mga aking lalaki nin toninong—nasasabotan ninda an gabos na bagay na nasa video! An sarong bareta hale sa Malawi nagsasabi na an hoben na mga tugang na lalaki asin babae duman nasasabotan man iyan huli ta naeeksperyensiahan ninda an kaparehong mga impluwensia hale sa saindang mga kairiba sa eskuelahan. An sarong ama sa Alemania nagsabi manongod sa video: “Naniniwala ako na iyan simbag sa sakong mga pamibi.” An sarong hoben nagsabi: “Mabalos sa pagpagirumdom sa sako na si Jehova talagang may pagmakolog sa sako.” An sarong magurang sa kongregasyon sa Nueva Zelandia nagbareta: “Nakatabang iyan sa saro sa samong mga tinedyer na makabalik sa dalan pasiring sa buhay.” An sarong may agom na nasa edad na dinalan iyan asin nagsabi: “Kanigoan an pagmawot ko na an lambang hoben na nasa katotoohan madalan an video na ini asin mapahiro na isapuso an katotoohan!” Mga pamilya, taano ta dai iyan dalanon giraray? Pagkatapos, iribang pag-olayan an minasunod na mga hapot.
2 Introduksion: Ano an tunay na katood?—Tal. 18:24.
3 Mga Balakid sa Pakikikatood: Paano nindo madadaog an pakamate na dai kamo inaako? (Fil. 2:4) Taano ta dapat kamong magin andam na paoswagon an saindong personalidad, asin siisay an makakatabang sa saindo na gibohon iyan? Ano an makamumukna nin mga oportunidad tangani na magkaigwa nin dakol pang katood, asin saen sinda puedeng manompongan?—2 Cor. 6:13.
4 Pakikikatood sa Dios: Paano kamo makapatatalubo nin relasyon ki Jehova, asin taano ta bakong sayang an paghihingoa? (Sal. 34:8) Siisay an pinakamarahay na makapakokosog kan saindong pakikikatood sa Dios?
5 An Salang Klase nin mga Katood: Sairisay an maraot na pag-iriba? (1 Cor. 15:33) Paano an salang klase nin mga katood puedeng giyahan an saro pasiring sa espirituwal na kapahamakan? Ano an itinotokdo sa saindo kan pagkasaysay sa Biblia manongod ki Dina?—Gen. 34:1, 2, 7, 19.
6 Sarong Modernong Aldaw na Drama: Paano nakaapektar ki Tara an kamondoan? Paano nia ipinangatanosan an saiyang pakikiasosyar sa kinabanon na mga hoben? Iinatubang ninda sia sa anong mga peligro? Taano ta dai naheling kan saiyang mga magurang an peligro na linaogan nia, alagad paagi sa anong aktitud na tinabangan ninda sia na marahayan sa espirituwal? Paano an sarong payunir na tugang na babae nagin tunay na katood para ki Tara? Taano ta dapat na himateon nin mga Kristiano an Talinhaga 13:20 asin Jeremias 17:9? Anong importanteng leksion an nanodan ni Tara?
7 Konklusyon: Anong mga leksion an nanodan nindo sa video na ini? Paano nindo iyan magagamit sa pagtabang sa iba?—Sal. 71:17.