Itokdo sa Iba an Dalisay na Tataramon
1 Apisar na hale sa dakol na ‘nasyon, tribo, banwaan patin tataramon,’ an Mga Saksi ni Jehova sarong nagkakasararong banwaan, sarong tunay na internasyonal na kasararoan nin magturugang. (Kap. 7:9) Sa nababangang kinaban ngonyan, iyan pambihira. Paano iyan posible? Huli ta tinawan kita nin “pagbago sa dalisay na tataramon.”—Sof. 3:9.
2 Makangangalas na mga Epekto: Ano an dalisay na tataramon na ini? Iyan an tamang pakasabot sa katotoohan na yaon sa Tataramon nin Dios mapadapit ki Jehova asin sa saiyang mga katuyohan, partikularmente an katotoohan manongod sa Kahadean nin Dios. Siring sa pagkahula ni Jesus, itinatao an katotoohan na ini paagi sa sarong naheheling na daganon na pinakapaagihan, “an fiel asin may diskresion na oripon,” na an resulta an mga tawo “hale sa gabos na tataramon kan mga nasyon” nag-aako kan tunay na pagsamba.—Mat. 24:45; Zac. 8:23.
3 Mantang an mga tawo nakanonood kan dalisay na tataramon, napahihiro sinda na ioyon an saindang buhay sa mga pamantayan ni Jehova. Nakakanood sinda na “dayupot na magkasararo sa saro sanang pag-isip asin sa saro sanang paghonahona.” (1 Cor. 1:10) An pagtotokdo nin Dios nagbubunga man sa sainda nin tanos na gawe-gawe asin nakararahay, sadiosan na pagtaram, nangorogna mapadapit sa pagsabi sa iba kan maogmang bareta. (Tito 2:7, 8; Heb. 13:15) An makangangalas na mga pagbabagong ini nagtataong onra ki Jehova.
4 Halimbawa, an sarong lalaki na nakaolay manongod sa maogmang bareta igwa nin dakol na hapot, na an gabos sinimbag hale sa Biblia. Napahiro kan saiyang nadangog, sia nagpoon na mag-adal nin duwang beses sa sarong semana asin mag-atender sa mga pagtiripon. Napangalas sia sa makikatood na pag-ako sa saiya sa Kingdom Hall, huling an dakol sa mga nag-atender laen-laen an rasa. Sa laog nin halipot na panahon, sindang mag-agom naggibo nin pagbabago sa saindang buhay asin nagpabautismo. Poon kaidto natabangan nia an mga 40 iba pa na maglingkod ki Jehova, kaiba an kadakol na miembro kan pamilya. Apisar na may diperensia, sia nagpoon kasuarin pa sana na maglingkod bilang payunir.
5 Pagtotokdo sa Iba: An mga pangyayari sa kinaban nagigin dahelan tanganing siyasaton liwat kan dakol na sadiosan an saindang kaisipan asin an saindang buhay. Siring ki Jesus, maninigo kitang magmawot na tabangan sinda. An epektibong mga pagdalaw liwat asin pag-adal sa Biblia liabe sa pagtabang sa mga sinsero na makanood kan dalisay na tataramon.
6 An sarong pagdolok na nagin nang epektibo sa sibot na mga tawo iyo an pamamayo nin halipot na pag-adal sa Biblia sa mismong pinto ninda. (km-BI 5/02 p. 1) Naprobaran na daw nindo ini? Kun kamo nag-aandam na dumalaw liwat, pumili hale sa suplemento kan Mayo 2002 na An Satong Ministeryo sa Kahadean nin sarong presentasyon na angay sa kagharong. An dakol sa mga presentasyon sa suplementong ini dinisenyo tangani na direktamenteng magiya sa pag-orolay sa brosyur na Kahagadan o sa librong Kaaraman. Ensayohon an presentasyon tangani na pasil kamong makapoon sa introduksion pasiring sa pag-orolay sa saro kan mga parapo. Pumili nin saro o duwang teksto hale sa parapo na babasahon asin pag-oolayan, asin mag-andam nin sarong hapot na magigin pankonklusyon. Iyan makakatabang na gumiya sa parapo na plano nindong ipakipag-olay sa masunod na pagdalaw.
7 An banwaan ni Jehova nakakaeksperyensia nin dakol na bendisyon bilang resulta nin pakanood kan dalisay na tataramon. Maigot logod niatong tabangan an iba na umiba sa sato sa ‘pag-apod sa ngaran ni Jehova’ asin sa ‘daramay na paglilingkod sa saiya.’—Sof. 3:9.