Gibohon na Nakagiginhawa
1 An mensahe kan Biblia nakagiginhawa sa gabos na nag-aako asin nag-aaplikar kaiyan sa saindang buhay. (Sal. 19:7, 8) Iyan nakakatabang sa sainda na makatalingkas sa falsong mga katokdoan asin nakadadanyar na mga kaugalean saka nagtatao nin masasarigan na paglaom para sa ngapit. Minsan siring, bako sanang an mga nag-aako kan maogmang bareta an makikinabang. An mga nagpapaabot sa iba kan nakagiginhawang mga katotoohan sa Biblia nagiginhawahan man mismo.—Tal. 11:25.
2 Napakokosog kan Ministeryo: Si Jesus nagsabi na an mga nag-aako kan sakal na Kristianong pagkadisipulo, kaiba an paghuhulit asin paggibo nin mga disipulo, ‘makakukua nin kaginhawahan para sa saindang kalag.’ (Mat. 11:29) Nanompongan nia mismo na nakapakokosog an pagpapatotoo sa iba. Iyan siring sa pagkakan para sa saiya. (Juan 4:34) Kan sugoon nia an 70 disipulo na maghulit, sinda naggayagaya kan maheling ninda na sinusuportaran ni Jehova an saindang mga paghihingoa.—Luc. 10:17.
3 Dakol na Kristiano ngonyan an napakokosog man kan saindang pakikikabtang sa paghuhulit. An sarong tugang na babae nagsabi: “Nakagiginhawa an ministeryo huli ta tinatawan kaiyan nin direksion asin katuyohan an buhay ko. An personal na mga problema asin aroaldaw na mga tension minasadit kun ako nakikikabtang sa paglilingkod.” An saro pang maigot na ministro nagsabi: “An ministeryo . . . nagpapagirumdom sa sako aroaldaw na si Jehova tunay asin nagtatao sa sako nin katoninongan saka sarong sokol nin panlaog na kaogmahan na dai makakamtan sa ano man na ibang paagi.” Kanigoan na pribilehio niato na magin “mga kapwa trabahador nin Dios”!—1 Cor. 3:9.
4 Maboot an Sakal ni Cristo: Mantang sinasadol an mga Kristiano na ‘maghingoa nin maigot,’ si Jesus dai naghahagad nin labi pa sa kaya niatong itao. (Luc. 13:24) Tunay nanggad, mamomoton na iniimbitaran nia kita na ‘pumairarom sa saiyang sakal kaiba nia.’ (Mat. 11:29, nota sa ibaba) An mga nagkakaipong pangganahan an depisil na mga kamugtakan puedeng magkompiar na an bilog na kalag na paglilingkod ninda, dawa limitado, nakaoogmang marhay sa Dios.—Mar. 14:6-8; Col. 3:23.
5 Kanigoan kanakagiginhawa na maglingkod sa Dios na nag-aapresyar ano man an gibohon niato para sa kapakanan kan saiyang ngaran! (Heb. 6:10) Logod na pirme kitang magmaigot na itao sa saiya an satong pinakamakakaya.