Arogon an Karahayan ni Jehova
1 Pakatapos na mag-ogma sa kahangahangang pagsolnop nin saldang o masiram na pagkakan, dai daw kita napahihirong pasalamatan si Jehova, an Burabod nin gabos na karahayan? An karahayan nia an nagpapahiro sa sato na booton na arogon sia. (Sal. 119:66, 68; Efe. 5:1) Paano niato ikapaheheling an kualidad na karahayan?
2 Sa mga Daing Pagtubod: An sarong paagi na maaarog niato an karahayan ni Jehova iyo an pagpaheling nin sinserong pagmalasakit sa mga daing relasyon sa sato sa pagtubod. (Gal. 6:10) An pagpaheling nin karahayan sa praktikal na mga paagi puedeng magkaigwa nin positibong epekto sa kun paano ninda minamansay an Mga Saksi ni Jehova asin an mensahe na dara niato.
3 Halimbawa, mientras na naghahalat sa sarong klinika, an sarong hoben na payunir na tugang na lalaki nakatukaw kataed nin sarong may edad nang babae na garo mas grabe an helang kisa sa kadaklan na ibang yaon duman. Kan turno na nia na magkonsulta sa doktor, tinogotan nia an babae na maenot sa saiya. Sa huri nanuparan nia giraray an babae, ngonyan sa sadan na, asin ogmahon an babae na maheling sia. Minsan ngani kan nakaagi dai sia naghihimate sa maogmang bareta, nagsabi sia na ngonyan aram na nia na an Mga Saksi ni Jehova tunay na namomoot sa saindang kapwa. Naponan an sarong regular na pag-adal sa Biblia sa saiya.
4 Sa Satong mga Tugang: Inaarog man niato an karahayan ni Jehova kun hinihingoa niatong tabangan an mga kapagtubod. Sa mga panahon nin kalamidad, kita an enot na minaabot sa pag-ayuda sa mga tugang niato. Ipinaheheling niato an iyo man sanang aktitud na ini kun tinatabangan niato an mga nagkakaipo nin transportasyon pasiring sa mga pagtiripon, dinadalaw an mga maluya an hawak, asin pinahihiwas an pagpadangat sa mga dai tang gayo kamidbid sa kongregasyon.—2 Cor. 6:11-13; Heb. 13:16.
5 An saro pang paagi na ipinaheheling ni Jehova an karahayan iyo an saiyang pagigin “andam na magpatawad.” (Sal. 86:5) Bilang pag-arog sa saiya, ikapaheheling niato an satong pagkamoot sa karahayan paagi sa pagpapatawad sa iba. (Efe. 4:32) Ini nakakatabang na magin ‘marahay asin maogma’ an satong pakikiasosyar sa mga kapagtubod.—Sal. 133:1-3.
6 Logod na pangyarihon kan abundang karahayan ni Jehova na kita magsulwak sa pag-omaw sa saiya asin magin masinggayang-masinggaya. Asin logod na pahiroon kita kaiyan na magmaigot na arogon an saiyang karahayan sa gabos niatong ginigibo.—Sal. 145:7; Jer. 31:12.