Tabangan an mga “May Tamang Tendensia”
1. Siisay an tinitipon ni Jehova sa saiya sa satong aldaw?
1 An lambang saro igwa nin tendensia na nakagamot na sa saiyang piguratibong puso. (Mat. 12:35) An Biblia nagtataram manongod sa saro na an “puso makiiwalon.” (Sal. 55:21) May mga “aranggoton.” (Tal. 29:22) Alagad igwa man nin mga “may tamang tendensia sa buhay na daing katapusan.” (Gibo 13:48) Sa satong aldaw, tinitipon ni Jehova sa saiya an siring na mga may tamang tendensia. (Hag. 2:7) Paano kita makakatabang sa sainda na magin mga parasamba ki Jehova?
2. Ano an kalabot sa pag-otob kan sugo sa sato na gumibo nin mga disipulo?
2 Maatom na Dumalaw Liwat: An pagkaigwa nin tamang punto de vista sa mga pagdalaw liwat mahalagang marhay tanganing maotob niato an sugo sa sato na gumibo nin mga disipulo. (Mat. 28:19, 20) Tolos daw na kinukultibar niato an interesadong nanonompongan niato? Sinosongko daw niato liwat an gabos na nag-aako nin mga babasahon o nagpapahayag nin interes sa maogmang bareta? Nagpoprosegir daw kita sa satong mga paghihingoa na tabangan sinda na tumalubo sa espirituwal? Huling buhay an kalabot, maninigo niatong hingoahon na kultibaron an gabos na interesadong nanonompongan niato.
3. Ano an maninigo niatong gibohon pakatapos na may makaolay sa ministeryo?
3 Mantang presko pa sa saindong isip an pakikipag-olay sa sarong interesado, pumondo nin kadikit tangani na isurat an saiyang ngaran asin adres. Isurat an tema na pinag-olayan, an ano man na mga tekstong binasa, asin kun anong babasahon an ikinapasakamot. Pakatapos kaiyan, magin desidido na dumalaw liwat sa pinakamadaling panahon na mapupuede.
4. Paano kita makagigibo nin epektibong mga pagdalaw liwat?
4 Pagdalaw Liwat: Kun kamo nagdadalaw liwat, makakatabang an pagigin may entusiasmo asin makikatood saka an pagpaheling nin sinserong personal na interes sa kagharong. Papagdanayon na simple asin sono sa Kasuratan an pag-oolay. Mag-andam nin interesanteng tema sa Biblia na ipakikipag-olay, asin sa pagtatapos kan pagsongko, magpalataw nin hapot na puedeng simbagon sa masunod na pagdalaw. Pinakamarahay na likayan an dai kinakaipuhan na pakiargumento dapit sa bakong sono sa Kasuratan na mga punto de vista na tibaad ipahayag kan kagharong. Magmaigot na gamiton na basehan an mga bagay na mapagkakaoyonan nindo.—Col. 4:6.
5. Anong paghihingoa an ginibo nin sarong payunir, asin may anong mga resulta?
5 An mga pagdalaw liwat nagkakaipo nin paghihingoa, alagad nakakokontento an mga balos. An sarong payunir sa Hapon naggibo nin pasohan na dugangan an pagdalaw liwat kada bulan. Pinonan niang magkaigwa nin rekord kan gabos na nanonompongan nia sa pagharongharong, dangan sa laog nin pitong aldaw, sinosongko nia sinda giraray. Maingat niang inaandam an sasabihon nia asin ginigibo an paglilingkod nia na may kompletong kompiansa sa mensahe na dara nia. Sa saro sa mga pagsongko nia, nakapagpoon sia nin pag-adal sa saro na nagsabi: “Pirme ko kamong sinasayumahan. Ini an kaenot-enote na naghinanyog ako.” Nagbunga an mamomoton na pagkadesidido kan payunir. Sa katapusan kan bulan nagreport sia nin sampulong pag-adal sa Biblia.
6. Taano ta dapat kitang magprosegir na dumalaw liwat?
6 An mga sirkonstansia nin mga tawo pirmeng nagbabago. (1 Cor. 7:31) Parateng kaipuhan nin nagkapirang pagprobar tangani na manompongan giraray sa harong an interesado. Paagi sa maatom na mga pagdalaw liwat niato, matatabangan niato an mga may tamang tendensia na lumakaw sa dalan pasiring sa buhay na daing katapusan.—Mat. 7:13, 14.