Pag-andam—Importanteng Marhay sa Epektibong mga Pagdalaw Liwat
1. Sa anong paagi papahiwason kaidto an enot na Kristianong ministeryo?
1 Lubos na inandam ni Jesus an saiyang mga disipulo na magin epektibong mga parahulit kan “maogmang bareta kan kahadean.” (Mat. 4:23; 9:35) Sa Palestina sana ginibo an pagsasanay. Minsan siring, bago magsakat sa langit, sinabi ni Jesus na an Kristianong ministeryo papahiwason na marhay tanganing ‘makagibo nin mga disipulo sa mga tawo kan gabos na nasyon.’—Mat. 28:19, 20.
2. Ano an kalabot sa pagkuyog sa pagboot ni Jesus na ‘gumibo nin mga disipulo’?
2 Kalabot sa gibohon na iyan an pagdalaw liwat sa mga indibiduwal na nagpaheling nin interes sa maogmang bareta kan Kahadean nin Dios asin pagtokdo sa sainda na otobon an gabos na bagay na ipinagboot ni Cristo. Tanganing magin epektibo sa mga pagdalaw liwat, kaipuhan niatong magin andam na marhay.
3. Dawa sa enot pa sanang pagdalaw, paano nindo puedeng bukasan an dalan para sa pagdalaw liwat?
3 Magplano Antes Pa: An nagkapirang parahayag naghihingoa na maghapot sa katapusan kan enot na pagdalaw dangan nanunuga na mabalik asin pag-oolayan an simbag. Sa pagdalaw liwat, naeksperyensiahan ninda na an pagsambit sa impormasyon na yaon sa librong Itinotokdo kan Biblia nakakatabang sa sainda na makapoon tolos nin pag-adal sa Biblia.
4. Taano ta dai niato maninigong halaton an bagong mga isyu kan mga magasin bago dumalaw liwat?
4 An pagkaigwa nin saro sanang padis nin magasin para sa kada bulan dai nangangahulogan na maninigo niatong halaton sagkod na maresibi niato an mga isyu para sa sunod na bulan bago dumalaw liwat. Tibaad posibleng pukawon an interes paagi sa pakikipag-olay dapit sa impormasyon na itinampok sa magasin na igwa na an tawong iyan.
5. Ano an pakinabang kun nasa isip na niato an satong katuyohan?
5 Magkaigwa nin Katuyohan: Bago dumalaw liwat, gumamit nin pirang minuto tanganing repasohon an saindong mga rekord asin tanganing aramon kun ano an gusto nindong magibo. Halimbawa, ipakipag-olay an sarong punto hale sa publikasyon na iwinalat nindo kan nakaagi. O magwalat nin dugang pang babasahon na konektado sa pag-oolay kaidto. Kun may ihinapot kamo kan nakaaging pagdalaw, siertong kaiba sa saindong katuyohan an pagsimbag sa hapot na iyan. Kun itinatampok an sarong teksto na nagpapatunay sa sarong punto na sinasabi nindo, maghingoang basahon iyan nin direkta hale sa Biblia.
6. Ano an satong pasohan sa pagdalaw liwat?
6 An Satong Pasohan: Siempre, an satong pasohan iyo na makapoon nin pag-adal sa Biblia. An sarong tugang na lalaki nag-alok nin pag-adal sa Biblia durante nin pagdalaw liwat, alagad nagsayuma an lalaking kaolay nia. Nagbalik an tugang na dara an pinakabagong mga magasin asin nagsabi, “Mientras na yaon na man sana kami digdi, boot ming simbagon an sarong hapot sa Biblia na ihinahapot nin mga tawo ngonyan.” Pakatapos na makua an mga komento kan lalaki, binasa kan tugang an sarong teksto asin angay na parapo hale sa sarong publikasyon na ginagamit sa pag-adal sa Biblia. Iyan nagresulta sa regular na pag-adal sa Biblia.
7. Paano an pagigin andam na marhay nakakatabang sa saindo na makapoon nin pag-adal sa Biblia?
7 Bako nanggad na sayang an paghihingoa na gumamit nin panahon sa pag-andam para sa mga pagdalaw liwat. Magigin mas magayagaya kita, asin puede kitang magkaigwa kan pribilehio na tabangan an saro na “may tamang inklinasyon” sa dalan pasiring sa buhay.—Gibo 13:48.