Magin Banal sa Gabos Nindong Paggawe
1. Taano ta mahalaga na magin banal sa gabos niatong paggawe?
1 Bilang mga lingkod kan banal na Dios, si Jehova, nagmamaigot kitang magin banal sa gabos niatong paggawe. (1 Ped. 1:15, 16) Nangangahulogan ini na naghihingoa kitang suportaran an mga pamantayan ni Jehova sa gabos na aspekto kan satong buhay. An pandistritong kombension ngonyan na taon matao sa sato nin espesyal na oportunidad na ipaheling an banal na paggawe.
2. Bilang pag-andam para sa pandistritong kombension, taano ta maninigo niatong konsideraron an satong itsura?
2 Mabining Personal na Itsura: “An Mga Saksi ni Jehova an pinakamarahay! An mga miembro nindo maboot asin husay an gubing, patin nagpapaheling sinda nin hararom na paggalang.” Iyan an sabi nin sarong representante nin otel sa sarong pandistritong kombension kan nakaaging taon. Sa saro pang kombension, nagkomento an sarong nagtatrabaho sa otel: “Risang-risa na an mga miembro nindo nakagubing para sa Dios.” Iyo, naririparo nin iba an mga delegado kan kombension. Kun siring, gusto niatong maggubing “sa paagi na angay sa maogmang bareta.”—Fil. 1:27.
3. Taano ta depisil para sa saro na maggubing asin mag-alinyar sa mabining paagi?
3 Puedeng magin depisil an pagpabanaag nin kabinian sa satong itsura. An inmoral na kinaban ni Satanas nakakaimpluwensia sa mga tawo na arogon an bakong mabini, makalaman, asin palaen na mga estilo na bakong angay. (1 Juan 2:15-17) Huli kaini, sa satong paggubing kaipuhan niatong “isikwal an kabikoan asin an kinabanon na mga mawot asin mamuhay na may toltol na isip . . . sa tahaw kan presenteng sistemang ini nin mga bagay.” (Tito 2:12) Nungka niatong bobooton na madisturbo an iba paagi sa satong itsura, sinda man mga tugang niato, tawohan sa otel o restawran, o iba pang nagmamasid.—1 Cor. 10:32, 33.
4. Anong mga hapot an makakatabang sa sato na siyasaton an satong personal na itsura?
4 Mabini Asin Husay na Gubing: Kun nag-aandam para sa kombension, hapota an saindong sadiri: ‘Mabini daw an sakong gubing, o iyan daw nakakaapod nin dai maninigong atension sa sako? Iyan daw nagpapaheling nin paggalang sa mga saboot nin iba? An blusa ko daw hababaon sa may daghan o halipoton iyan? An mga bado ko daw yapit o naheheling na an parte kan hawak na dapat na natatahoban? Angay daw an gubing ko para sa sarong delegado kan kombension na nakasulot nin badge card? An gubing daw na sulot ko sa panahon nin paglilibang mapangyari sa sako na masupog na magpatotoo nin impormal?’—Roma 15:2, 3; 1 Tim. 2:9.
5. Paano an iba makakatabang sa sato na magkaigwa nin mabining itsura?
5 Makikinabang kita sa mga obserbasyon nin maygurang na mga Kristiano. An mga agom na babae maninigong hapoton an saindang agom kun ano an tibaad magin pagheling nin iba sa saindang gubing. Matatabangan nin diosnon na mga magurang an saindang tinedyer na mga aki mapadapit digdi. Dugang pa, an kagalanggalang na mas may edad na mga tugang na babae puedeng ‘mapabalik sa toltol na isip an hoben na mga babae na . . . magin toltol an isip, mabini’ sa saindang itsura “tanganing an tataramon nin Dios dai mapagtaraman na may panlilibak.” (Tito 2:3-5) An mga publikasyon niato nagtatao nin nakakatabang na mga ilustrasyon na naglaladawan nin mabini asin husay na gubing.
6. Ano an kaiba sa marahay na paggawe sa lugar kan kombension?
6 Magin Makonsiderasyon sa Iba: Nangorogna na maninigong magin risang-risa an satong marahay na paggawe sa lugar kan kombension. Makikooperar tabi sa pagdirehir kan mga attendant, sa paradahan sagkod sa auditoryum. (Heb. 13:17) An mga pamilya maninigong tumukaw nin taraed imbes na togotan an saindang mga aki, pati an mga tinedyer, na tumukaw kaibanan kan mga grupo nin ibang hoben. An ano man na klaseng recorder dai maninigong ikonektar sa electrical o sound system kan pasilidad asin puede sanang gamiton sa paagi na dai makakadisturbo sa iba. Kun gusto nindong kumua nin mga retrato, dai maninigong gumamit nin flash durante kan mga sesyon. An mga pager asin cell phone maninigong iprograma sa paagi na dai makakadisturbo.
7. Paano nagpapamuraway sa Dios an satong paggawe sa mga kombension?
7 An satong paggawe ilinalaen kita sa iba asin iyan nagpapamuraway sa satong Dios. (1 Ped. 2:12) Sa kombension, maheheling kan publiko an hiro-hiro kan Mga Saksi ni Jehova. Kun siring, magin determinadong magin banal sa gabos nindong paggawe.
[Kahon sa pahina 5]
Magpaheling nin Banal na Paggawe
◼ Maggubing na angay sa sarong Saksi
◼ Bantayan na marhay an mga aki
◼ Magin makonsiderasyon sa iba