Musika na Nakakarepresko
1 An pag-awit asin musika mahalagang kabtang nin tunay na pagsamba. Sa suanoy na Israel, si Asaf asin an saiyang mga tugang na lalaki nag-awit: “Magpasalamat kamo ki Jehova. . . . Umawit kamo sa saiya, umawit kamo nin melodiya sa saiya, magpaheling kamo nin interes sa gabos niang makangangalas na gibo.” (1 Cron. 16:8, 9) Ngonyan nag-aawit kita ki Jehova sa satong semanal na mga pagtiripon kan kongregasyon. (Efe. 5:19) Marahayon nanggad na oportunidad ini na mag-omaw sa ngaran nia!—Sal. 69:30.
2 An paghinanyog sa Kingdom Melodies, mga awit pan-Kahadean na tinugtog nin orkestra, papanoon an isip niato nin espirituwal na mga ideya. “Mantang pinapatugtog an mga melodiya, nagigirumdoman ko an mga liriko,” an paliwanag nin sarong tugang na babae. “Kanigoan karahay na paagi na papagdanayon si Jehova sa sakong isip mientras na naoogma sa musika!”—Fil. 4:8.
3 Mga Okasyon na Ikakaogma Iyan: An pagpatugtog kan Kingdom Melodies sa harong nagbubunga nin mainit asin espirituwal na palibot na nakakakontribwir sa katoninongan kan pamilya. “Pinapatugtog niamo [an musikang] ini nin paorootro sa samong harong asin kotse pero nungkang nagsasawa sa nakakapukaw sa boot na pagkahaman kaiyan,” an isinurat nin sarong pamilya. “Sa parate an Kingdom Melodies nagtatao sa samo kan tamang matoninong na kamugtakan nin isip kun nag-aandam para sa Kristianong mga pagtiripon o kun nagbibiahe pasiring sa sarong asamblea.” An sarong tugang na babae nagsabi: “Tunay na nakakaogma iyan na hinanyogon kun nagtatrabaho ako sa harong—siisay baga an mag-iisip na magayagaya ako mientras na nagtitipig nin mga linabahan? Pinaplano kong patugtogon an musikang ini kun makuri an kamondoan ko. An musika may nakakarepresko nanggad na epekto! . . . An lambang awit nagpapaogma.” May mga pangyayari daw na makikinabang kamo sa siring na nakakarepreskong musika?
4 An kadaklan na musika ngonyan nagpapabanaag kan espiritu nin kinaban. Makakatabang an mga magurang sa saindang mga aki na kultibaron an pagkagusto sa kapakipakinabang na musika paagi sa paggamit na marhay kan mga rekording nin Kingdom Melodies. Dakol na inaadalan sa Biblia asin interesado an maoogma man na maaraman an manongod sa magayon na espirituwal na mga awit na ini, na nagpapamuraway ki Jehova asin nakakapaogma sa espiritu.—Sal. 47:1, 2, 6, 7.