Hapot

◼ Paano maninigong kumua nin personal na mga kopya kan An Torrengbantayan asin Awake!?

Huling nahaloyhaloy nang ipinondo an areglo sa suskripsion para sa An Torrengbantayan asin Awake! sa gabos na lenguahe, an gabos na parahayag maninigong kumua kan saindang mga magasin paagi sa lokal na kongregasyon. An mga kongregasyon puedeng magpedido nin mga magasin paagi sa pormang Congregation Requests (M-202). An mga edisyon na ibang tataramon asin darakula an letra maninigo man na pedidohon paagi sa paggamit kan pormang ini.

Kun igwa sa saindong teritoryo na naghahagad na regular na hatodan nin magasin, seguradohon tabi na hatodan sinda tolos-tolos tangani na mayo ni sarong isyu na malipasan. An mga natiwalag puedeng kumua kan personal nindang gagamiton na mga magasin o iba pang literatura sa counter kan magasin asin literatura sa Kingdom Hall. An mga natiwalag dai maninigong iiba sa personal na ruta nin magasin.

An solamenteng mga suskripsion na papagdadanayon sa file kan sangang opisina digdi sa Pilipinas iyo an para sa mga dai mahahatodan nin parahayag kan kongregasyon paagi sa ruta nin magasin. Kun an Komite sa Paglilingkod kan Kongregasyon magsumitir nin pedido nin suskripsion para sa saro na mayo nin ibang paagi na makakua kaiyan, maninigo na iiba kan sekretaryo an sarong halipot na surat na nagpapatunay na an pedidong ini nin suskripsion rinepaso asin inaprobaran kan Komite sa Paglilingkod kan Kongregasyon.

Ini nangangahulogan na an mga parahayag dai maninigong magsurat sa sangang opisina tangani na maghagad nin personal na mga suskripsion. Ibabalik sa kongregasyon an ano man na siring na mga kahagadan sa suskripsion hale sa mga parahayag o interesado.

◼ Paano puedeng kumua nin personal na kopya kan mga magasin an sarong preso?

Kun an kongregasyon na nag-aasikaso kan paghuhulit sa sarong presohan puedeng magsuplay kan mga magasin sa mga preso na yaon dian, kun siring an sarong preso maninigong kumua kan saiyang personal na kopya kan mga magasin na An Torrengbantayan asin Awake! paagi sa nagdadalaw na mga parahayag. Kun ini bakong posible, an preso puedeng personal na humagad nin mga suskripsion paagi sa pagsurat sa sangang opisina. Mangnohon tabi na an natiwalag na mga preso puede man na kumua nin personal na kopya kan mga magasin siring sa sinabi sa parapong ini.