Papagdanayon an Pakamate nin Pagkaapurado!
1 Aram ni Jesus na limitado an panahon nia kaidto digdi sa daga sa paghaman kan gibohon kan saiyang Ama. (Juan 9:4) Huli kaini, ginibo nia an saiyang ministeryo na may pakamate nin pagkaapurado, asin sinanay nia an saiyang mga disipulo na gibohon man iyan. (Luc. 4:42-44; 8:1; 10:2-4) An materyal na mga bagay na nagtatao nin kaginhawahan ikaduwa sana an importansia para sa saiya. (Mat. 8:20) Sa siring, nahimo niang taposon an gibohon na itinao sa saiya ni Jehova na gigibohon.—Juan 17:4.
2 Limitadong Panahon: Limitado man an panahon sa paghulit kan maogmang bareta sa “bilog na ineerokan na daga.” (Mat. 24:14) Ihinahayag kan hula sa Biblia na kita nabubuhay na sa poro kan panahon nin katapusan. Sa dai na mahahaloy an ‘mga dai nakakamidbid sa Dios asin an mga dai nagkukuyog kan maogmang bareta manongod sa satong Kagurangnan na si Jesus . . . maagi kan hudisyal na padusa na daing katapusan na pagkalaglag.’ (2 Tes. 1:6-9) Bigla nanggad na maabot an paghokom na iyan. (Luc. 21:34, 35; 1 Tes. 5:2, 3) Kaipuhan na maaraman nin mga tawo an peligrosong situwasyon ninda. Paninimbagan niato na tabangan sinda na maghingoang kamtan an pabor ni Jehova mantang may panahon pa.—Sof. 2:2, 3.
3 Paggibo kan Bilog Niatong Makakaya: Huling rinerekonoser na “nainaan na an panahon na natatada,” tinatawan nin prioridad kan mga lingkod nin Dios an paghuhulit. (1 Cor. 7:29-31; Mat. 6:33) May nagkapira na hinaboan an mga oportunidad sa pagbuhay o iba pang personal na mga pinag-aaabot tanganing dagdagan an saindang pakikikabtang sa ministeryo. (Mar. 10:29, 30) An iba padagos na nagkakaigwa nin ‘dakol na gigibohon sa gibohon kan Kagurangnan’ sa ibong nin nagpapadagos na mga kasakitan. (1 Cor. 15:58) Dakol an nagpapahayag sa publiko kan maogmang bareta sa laog na nin mga dekada na daing pag-urong-sulong. (Heb. 10:23) Pinapahalagahan na marhay ni Jehova an gabos na siring na pagsakripisyo bilang pagsuportar sa intereses kan Kahadean.—Heb. 6:10.
4 An pagsentro kan satong buhay sa pagsamba ki Jehova, na kaiba an paghuhulit, nakakatabang sa sato na papagdanayon na harani sa isip an aldaw ni Jehova. Pinoprotehiran kita kaiyan na madisturbo kan kinaban ni Satanas asin pinapasarig kaiyan an satong desisyon na papagdanayon an banal na paggawe. (2 Ped. 3:11-14) Tunay nanggad, an pag-otob kan satong ministeryo na may pakamate nin pagkaapurado puedeng makapagligtas-buhay, sa sato sagkod sa mga naghihinanyog sa sato.—1 Tim. 4:16.