Hapot
◼ Ano an pinakamarahay na paagi nin pagdonar para sa kapakinabangan kan daing sukat na mga tugang sa ibang mga nasyon?
Kun minsan, may nababaretaan kita manongod sa mga tugang sa ibang nasyon na nangangaipo nin materyal na mga bagay huli sa paglamag, kalamidad, o iba pang depisil na kamugtakan. May mga tugang na napapahiro na magpadara nin pondo direktamente sa mga sangang opisina sa siring na mga nasyon. Puedeng gumibo nin kahagadan na gamiton an kuarta sa pagtabang sa sarong indibiduwal, sarong partikular na kongregasyon, o sarong piniling proyekto nin pagtogdok.—2 Cor. 8:1-4.
Minsan ngani kaomaw-omaw an siring na mamomoton na pagmakolog sa mga kapagtubod, sa parate igwa nin mga pangangaipo na mas apurado kisa nasa isip kan madonar. Sa nagkapirang kamugtakan, naasikaso na an pangangaipo na plano niang tabangan. Siempre, makakakompiar kita na kun nagpapadara nin donasyon sa satong lokal na sangang opisina para sa pambilog na kinaban na gibohon, Pondo sa Kingdom Hall, o pag-ayuda sa inagihan nin kalamidad, an mga pondong iyan na idinonar gagamiton oyon sa sinabi kan nagdonar.
An gabos na sangang opisina lubos na sinanay na asikasohon tolos an dai inaasahan na mga pangangaipo kan mga tugang. Sa gabos na kamugtakan, pirmeng iniimpormaran kan sangang opisina an Namamahalang Grupo mapadapit sa bagay na iyan. Kun kaipuhan nin dagdag na tabang, puedeng imbitaran kan Namamahalang Grupo na tumabang an kaharaning mga sangang opisina o puedeng magpadara direktamente nin pondo hale sa opisina prinsipal.—2 Cor. 8:14, 15.
Kun siring, an gabos na donasyon para sa pambilog na kinaban na gibohon, mga proyekto nin pagtogdok sa ibang mga nasyon, o pag-ayuda sa inagihan nin kalamidad maninigong ipadara sa sangang opisina sa nasyon na iniistaran nindo, magsalang paagi sa kongregasyon o direktamente. Paagi kaini, naaasikaso sa aregladong paagi kan “maimbod asin mapagmansay na oripon,” paagi sa organisasyonal na mga areglo na inestablisar kan Namamahalang Grupo, an mga pangangaipo kan pambilog na kinaban na kasararoan nin magturugang.—Mat. 24:45-47; 1 Cor. 14:33, 40.