An Panahon kan Memorial—Sarong Panahon nin Dinugangan na Aktibidad
1. Ano an nagin epekto kan “panapanahon na mga kapiestahan” sa matatakton sa Dios na mga Israelita?
1 Sa espesipikong mga panahon durante kan taon, isineselebrar kan suanoy na mga Israelita an “panapanahon na mga kapiestahan ni Jehova.” (Lev. 23:2) An pagtao nin panahon na horophoropon an karahayan kan saindang Dios nagbunga nin dakulang kagayagayahan asin nagpahiro sa sainda na magin maigot para sa dalisay na pagsamba.—2 Cron. 30:21–31:2.
2, 3. Taano ta tama na dugangan niato an satong espirituwal na aktibidad durante kan panahon kan Memorial, asin noarin niato iseselebrar an Memorial?
2 Sa presenteng mga panahon, an satong magayagayang teokratikong aktibidad nadadagdagan taon-taon durante kan panahon kan Memorial. Iyan an panahon na hinohorophorop niato nin odok an daing kaagid sa halagang balaog na itinao ni Jehova sa kapakanan niato—an saiyang bugtong na Aki. (Juan 3:16; 1 Ped. 1:18, 19) Mantang hinohorophorop niato an pagkamoot na ipinaheling nin Dios asin kan saiyang Aki, namomotibar kita na omawon si Jehova asin maghingoa sa paggibo kan kabotan nin Dios.—2 Cor. 5:14, 15.
3 Ngonyan na taon an Pamanggihan nin Kagurangnan gigibohon sa Huebes, Marso 24, pagkasolnop kan saldang. Asin huling poon Marso 21 sagkod Abril 17 may espesyal na pagwaras kita kan brosyur na Magdanay Kamong Mapagbantay!, bobooton niato na gumibo nin espesyal asin sararong paghihingoa sa panahon na iyan. Paano niato puedeng dugangan an satong pakikikabtang sa ministeryo durante kan mga bulan nin Marso, Abril, asin Mayo?
4, 5. (a) Ano an nakatabang sa nagkapira na mapaabotan kan maogmang bareta an dakol pang tawo? (b) Ano an nanompongan nindo na epektibo sa lokal?
4 Kaolayon an Dakol Pang Tawo: Humanap nin mga paagi na makaolay an pinakadakol na tawong mapupuede kun kamo nakikikabtang sa paglilingkod sa langtad. Puede daw nindong planohon na makikabtang sa pagharongharong sa panahon na nasa harong na an mas dakol na tawo, arog kun pabanggi na o sa banggi? Kun an nagkapira sa saindong grupo nin pag-adal sa libro gustong makikabtang sa paglilingkod bago an pag-adal, puedeng iareglo kan paraataman sa pag-adal sa libro na magkaigwa nin halipot na pagtiripon bago maglingkod tanganing maghulit sa haraning teritoryo.
5 An saro pang paagi na makaolay an dakol na tawo iyo an pagpapatotoo sa pampublikong mga lugar. An sarong tugang na babae sa Hapon gustong mag-auxiliary payunir minsan ngani sia igwa nin bilog na panahon na trabaho. Isinuherir nin sarong magurang sa kongregasyon na kada aldaw bago maglaog sa saiyang sekular na trabaho, puede siang magpatotoo sa tinampo na harani sa sarong estasyon kan tren. Pakatapos na mapangganahan an saiyang pagkamasusupgon asin an pagtuya nin nagkapirang pasahero, nagkaigwa sia nin ruta nin magasin sa mga 40 katawo, kaiba an mga pasahero, mga empleyado sa estasyon, asin mga kagsadiri nin kaharaning pamakalan. Nakakapasakamot sia nin promedyong 235 magasin kada bulan. Paagi sa paghiras sa mga tawo nin sono sa Kasuratan na mga punto sa laog nin pira sanang minuto kada aldaw, nakapoon sia nin anom na pag-adal sa Biblia.
6. Paano puedeng dugangan nin mga hoben an saindang espirituwal na aktibidad?
6 Mga Oportunidad na Magpatotoo: Durante kan Marso, Abril, asin Mayo, bakasyon sa eskuelahan an kadaklan na parahayag na nag-eeskuela. Ini mga panahon na tamang-tama na mag-auxiliary payunir. Dugang pa, puedeng dugangan kan Kristianong mga hoben an saindang aktibidad paagi sa pagpatotoo sa eskuelahan. Tibaad magngalas kamo kun gurano kagustong maaraman kan mga kaklase nindo an manongod sa mga tinutubod nindo. Taano ta dai aprobetsaran na magpatotoo kun igwa nin mga pagtokar sa kuarto kan klase o paggibo nin mga komposisyon sa eskuelahan? An iba nagibo iyan na ginagamit an satong mga video. An nagkapira nakapoon nin mga pag-adal sa Biblia sa mga kaklase asin natabangan sinda na umoswag pasiring sa pagdusay asin bautismo. Ini marahayon na mga paagi na ‘omawon an ngaran ni Jehova.’—Sal. 148:12, 13.
7. (a) Paano inaprobetsaran nin sarong tugang na lalaki an mga oportunidad na magpatotoo sa iba? (b) Nagkaigwa na daw kamo nin kaagid na eksperyensia?
7 Sa aroaldaw na rutina nindo, humanap nin mga paagi na makaolay an mga tawo manongod sa satong makangangalas na Dios asin sa saiyang marahayon na mga panuga. An sarong tugang na lalaki na nagbibiahe aroaldaw lunad sa iyo man sanang mga tren nagpapatotoo sa mga kapwa pasahero kun angay. Halimbawa, mantang naghahalat sa sarong estasyon para sa masunod niang tren, nagpapatotoo sia sa sarong hoben na lalaki aroaldaw sa laog nin mga limang minuto. Bilang resulta, an hoben na lalaki asin an katrabaho kaini nag-oyon na mag-adal sa Biblia. An pag-adal sa Biblia ginigibo sa tren mantang sinda nagbibiahe. Paghaloyhaloy, an sarong may edad nang babae na haloy nang naghihinanyog sa mga pag-oolay ninda nagdolok sa tugang asin nakiolay digdi na adalan man sia sa Biblia. Sia man nag-aadal na sa mga aldaw na sia naglulunad sa tren. Paagi kaini, an tugang nakapagkondukta nin pag-adal sa sampulong iba-ibang indibiduwal sa tren.
8. Anong paagi nin paglilingkod an puedeng magpangyari sa mga nalilimitaran huli sa naglalangkaw na edad o mga problema sa salud na dugangan an saindang pakikikabtang sa ministeryo?
8 Kumusta kun limitado an kaya nindong gibohon huli sa naglalangkaw na edad o mga problema sa salud? Tibaad may mga paagi pa na puede nindong dugangan an saindong pag-omaw ki Jehova. Naprobaran na daw nindong magpatotoo paagi sa telepono? Kun bako kamong segurado kun paano ini gigibohon, sambiton iyan sa saindong paraataman sa pag-adal sa libro. Tibaad ikaareglo nia na ibanan kamo kan mga parahayag na naggagamit kan paaging ini. Sa pag-ibanan bilang magkapartner, makakanood kamo sa lambang saro asin matatabangan nindo an lambang saro na makatao nin epektibong patotoo. An epektibong mga suhestion sa pagpapatotoo paagi sa telepono makukua sa An Satong Ministeryo sa Kahadean na Pebrero 2001, pahina 5-6.
9. Paano niato matatabangan an mga inaadalan sa Biblia na makualipikar na umiba sa kongregasyon sa ministeryo sa publiko?
9 An pag-atender sa Memorial puedeng makapahiro sa mga bagohan na booton na dugangan an saindang pag-omaw ki Jehova. Makakatabang kamo sa sainda na mapangganahan an ano man na tibaad pagkahandal ninda manongod sa pakikikabtang sa pormal na paghuhulit paagi sa pagsaysay nin positibong mga eksperyensia sa paglilingkod sa langtad asin paagi sa progresibong pagsasanay sa sainda na ipaliwanag an mga katokdoan sa Biblia asin idepensa an saindang pagtubod. (1 Ped. 3:15) Kun sabihon nin sarong inaadalan sa Biblia na gusto na niang pumoon na magpahayag kan maogmang bareta, makipag-olay sa nangengenot na paraataman. Iaareglo nia na kaolayon an inaadalan sa Biblia tangani na determinaran kun baga kualipikado na siang umiba sa kongregasyon sa ministeryo sa publiko. Sierto nanggad na napapagayagaya an puso ni Jehova na maheling an mga bagohan na manindogan sa lado nia kan unibersal na isyu!—Tal. 27:11.
10. (a) Paano an marahay na iskedyul makakatabang sa sato na makapag-auxiliary payunir? (b) Nakagibo daw kamo nin areglo tangani na makapag-auxiliary payunir kan nakaaging taon durante kan panahon kan Memorial? Paano nindo ginibo iyan?
10 Puede daw Kamong Mag-auxiliary Payunir? Maninigong mansayon nin seryoso an kahagadan na 50 oras para sa auxiliary payunir. (Mat. 5:37) Ini nangangahulogan na kakaipuhanon nindong iareglo na gumamit nin promedyong 12 oras sa paglilingkod sa langtad kada semana. Angay daw sa saindong mga kamugtakan an saro sa sampol nin mga iskedyul para sa auxiliary payunir na nasa pahina 5? Kun bako, puede daw kamong mag-areglo nin iskedyul na magpapangyari sa saindo na makapag-auxiliary payunir sa Marso, Abril, o Mayo? Hagadon ki Jehova na bendisyonan an saindong mga paghihingoa na dugangan an saindong aktibidad sa paglilingkod.—Tal. 16:3.
11. Paano masusuportaran kan kamagurangan asin ministeryal na mga lingkod an mga maglilingkod bilang auxiliary payunir?
11 An kamagurangan asin ministeryal na mga lingkod lubos na susuportaran an mga paghihingoa nindo na gibohon na sarong espesyal na pag-omaw ki Jehova an panahon na ini kan Memorial, nangorogna huli sa kampanya kan brosyur na Magdanay Kamong Mapagbantay! Posibleng marhay na dakol sa sainda an ma-auxiliary payunir. Iaareglo kan kamagurangan na magkaigwa nin dagdag na mga pagtiripon bago lumuwas sa paglilingkod, arog baga kun mga pabanggi na, mga banggi nin ordinaryong mga aldaw, asin mga katapusan kan semana, kun kaipuhan. Tangani na determinaran kun saen asin kun noarin gigibohon an siring na mga pagtiripon patin kun siisay an puedeng mangenot, puedeng kaolayon kan kamagurangan an mga may depinidong plano o nag-iisip na magpayunir. Magmamaigot an kamagurangan na ikoordinar an mga areglo tangani na igwa nin iba pang parahayag na makakaibanan nindo sa mga aldaw asin oras na itinagama nindo para sa paglilingkod. Paagi kaini, marigon na ikakatalaan an mga plano asin dakol na karahayan an magigibo.—Tal. 20:18.
12. Ano an nagpapahiro sa sato na omawon si Jehova sa gabos na panahon?
12 Gibohon an Pinakamakakaya Nindo: Kun an saindong mga kamugtakan dai nagtotogot sa saindo na makapag-auxiliary payunir, girumdomon na inaako ni Jehova an satong mga paghihingoa asin pagsasakripisyo ‘sono sa kun ano an nasa sato, bakong sono sa kun ano an mayo sa sato.’ (2 Cor. 8:12) Kadakol kitang dapat ipagpasalamat ki Jehova. May marahay na dahelan na si David nagsurat: “Oomawon ko si Jehova sa gabos na panahon; an pag-omaw sa saiya pirmeng yaon sa sakong ngoso.” (Sal. 34:1) Logod na iyan an magin determinasyon niato durante kan panahon na ini kan Memorial.
[Kahon sa pahina 3]
Paano Nindo Dudugangan an Saindong Aktibidad?
◼ Maghulit sa panahon na an mga tawo nasa harong
◼ Magpatotoo sa pampublikong mga lugar
◼ Magpatotoo sa trabaho o eskuelahan
◼ Magpatotoo paagi sa telepono
◼ Maglingkod bilang auxiliary payunir
[Tsart sa pahina 5]
Sampol nin mga Iskedyul Para sa Auxiliary Payunir—Mga Paagi sa Pag-iskedyul nin 12 Oras sa Paglilingkod sa Langtad Kada Semana
Aga—Lunes Sagkod Sabado
An Domingo puedeng isalida sa arin man na aldaw.
Aldaw Peryodo Oras
Lunes Aga 2
Martes Aga 2
Mierkoles Aga 2
Huebes Aga 2
Biernes Aga 2
Sabado Aga 2
Total na Oras: 12
Duwang Bilog na Aldaw
Puedeng pumili nin arin man na duwang aldaw kan semana. (Depende sa mga aldaw na pinili, an iskedyul na ini puedeng magtotal sana nin 48 oras para sa bulan.)
Aldaw Peryodo Oras
Mierkoles Bilog na Aldaw 6
Sabado Bilog na Aldaw 6
Total na Oras: 12
Duwang Banggi Asin Sabado Patin Domingo
Puedeng pumili sa arin man na duwang banggi sa ordinaryong mga aldaw.
Aldaw Peryodo Oras
Lunes Banggi 11⁄2
Mierkoles Banggi 11⁄2
Sabado Bilog na Aldaw 6
Domingo Kabangang Aldaw 3
Total na Oras: 12
Tolong Hapon Asin Sabado
An Domingo puedeng isalida sa arin man na aldaw.
Aldaw Peryodo Oras
Lunes Hapon 2
Mierkoles Hapon 2
Biernes Hapon 2
Sabado Bilog na Aldaw 6
Total na Oras: 12
An Sakong Personal na Iskedyul sa Paglilingkod
Determinaran an bilang nin oras para sa kada peryodo.
Aldaw Peryodo Oras
Lunes
Martes
Mierkoles
Huebes
Biernes
Sabado
Domingo
Total na Oras: 12