Pampamilyang Iskedyul—Pampamilyang Paglilingkod sa Langtad
1 Dakulang kaogmahan ni Jehova na maheling an mga hoben na nag-oomaw kan saiyang ngaran. (Sal. 148:12, 13) Kan kaaldawan ni Jesus dawa an ‘mga omboy asin pasusohon nagtao nin pag-omaw’ sa Dios. (Mat. 21:15, 16) Nangyayari man iyan ngonyan. Mga magurang, paano nindo matatabangan an mga aki nindo na dumakula na magin maigot na mga paraomaw ki Jehova sa Kristianong ministeryo? Sa giraray, arog kan idinoon sa artikulo na nasa enotan manongod sa mga pagtiripon kan kongregasyon, an pangenot na makakakontribwir iyo an halimbawa nindo. An sarong ama nagpahayag nin saboot para sa mga magurang sa gabos na lugar kan sia magsabi: “Dai ginigibo kan mga aki an sinasabi nindo; ginigibo ninda an ginigibo nindo!”
2 Nagigirumdoman nin sarong tugang na babae na pinadakula nin matatakton sa Dios na mga magurang: “Nungka kaming nagmamata sa Sabadong aga na naghahapot kun baga maluwas kami sa ministeryo. Aram mi na iyo.” Kaagid kaiyan, puede nindong itadom sa mga aki nindo an importansia kan paghuhulit paagi sa pag-establisar nin daing liwat-liwat na semanal na rutina para sa pakikikabtang sa paglilingkod sa langtad bilang pamilya. Bako sanang nagpapangyari ini sa mga aki nindo na makanood paagi sa pag-obserbar sa saindo kundi pinapangyayari man kamo kaiyan na maobserbaran an saindang aktitud, mga ugale, asin nag-ooswag na mga abilidad.
3 Progresibong Pagsasanay: Tangani na ikaogma kan mga aki an ministeryo, kaipuhan na preparado sinda tanganing makapartisipar nin epektibo. An tugang na babae na kinotar kasubago nagsabi man: “Kami nungka na nagin mga nagsusunodsunod sana na nag-iiba sa samong mga magurang sa gibohon ninda. Aram mi na may kabtang kami, dawa kun iyan pagtimbre sana asin pagwalat nin imbitasyon. Paagi sa maingat na pag-andam bago an mga aktibidad kada katapusan kan semana, aram mi kun ano an sasabihon mi.” Puede nindong itao an siring na pagsasanay sa saindong mga aki paagi sa pagtao nin nagkapirang minuto kada semana tangani na andamon sinda para sa ministeryo, magsalang durante kan pampamilyang pag-adal o sa ibang panahon.
4 An iribang paghuhulit bilang pamilya nagtatao sa saindo nin dagdag na oportunidad na itadom an katotoohan sa mga aki nindo. An sarong Kristianong ama iiniiba an saiyang aking babae kun sia nagbabaklay nin 10 kilometros paduman asin pabalik tangani na magdistribwir nin mga pulyeto sa mga taga baryo sa masunod na kababan. “Sa panahon kan mga pagbaklay na idto,” an may pagkawiling nagigirumdoman nia, “na an katotoohan ikinatadom kan sakong ama sa sakong puso.” (Deut. 6:7) Logod na kamo bendisyonan man sa paggibo na magin kabtang kan saindong semanal na pampamilyang iskedyul an paglilingkod sa langtad.