Sarong Patotoo na Daing Tataramon
1 Minsan ngani dai nagtataram ni sarong tataramon, dakol an ihinahayag kan pisikal na linalang ni Jehova manongod sa saiyang dai naheheling na mga kualidad. (Sal. 19:1-3; Roma 1:20) Kaagid kaiyan, an satong marahay na paggawe, Kristianong mga kualidad, asin mabining itsura nagpapatotoo na dai nagtataram. (1 Ped. 2:12; 3:1-4) Maninigong magin kamawotan kan lambang saro sa sato na ‘samnohan an katokdoan kan satong Paraligtas, an Dios, sa gabos na bagay’ paagi sa satong paggawe.—Tito 2:10.
2 Paano posible para sa bakong sangkap na mga tawo na makadagdag sa pagigin nakakaakit kan mga katokdoan sa Biblia? Posible sana ini paagi sa paggiya kan Tataramon nin Dios asin kan kapangyarihan kan banal na espiritu. (Sal. 119:105; 143:10) An tataramon nin Dios “buhay asin mapuersa asin mas matarom kisa arin man na espada na may duwang tarom.” (Heb. 4:12) Nakakalagbas iyan sa kalaoglaogi niato asin nagpapangyari sa sato na ikasulog an bagong personalidad. (Col. 3:9, 10) An banal na espiritu nagpapaluwas sa sato nin kawiliwiling mga kualidad, arog kan kabootan, karahayan, kahoyoan, asin pagpopogol sa sadiri. (Gal. 5:22, 23) Tinotogotan daw niato bilang mga indibiduwal an tataramon asin espiritu nin Dios na makaimpluwensia sa satong buhay?—Efe. 4:30; 1 Tes. 2:13.
3 Nakakamasid an Iba: Kun kita namumuhay sono sa mga pamantayan ni Jehova asin nagmamaigot na ipabanaag an saiyang mga kualidad, namamasdan iyan kan iba. Halimbawa, estudyare an sarong lalaki na inoolog-olog kan saiyang mga katrabaho huli ta hababa sia. An sarong tugang na babae na nagtatrabaho sa iyo man sanang opisina pirmeng tinatrato sia na may dignidad asin paggalang. Nagpahiro ini sa saiya na hapoton an tugang na babae kun taano ta napapalaen ining marhay. Ipinaliwanag kan tugang na an saiyang magalang na paggawe resulta kan pag-aplikar nia sa saiyang buhay kan mga prinsipyo sa Biblia. Sinabi man nia sa lalaki an makangangalas na paglaom sa Kahadean. Nagpoon na mag-adal sa Biblia an lalaki asin sa kahurihurihi nagpabautismo. Kan magbalik sia sa saiyang dagang tinuboan, naghanga an mga paryente nia sa saiyang marahay na paggawe, asin nagkapira sa sainda an nag-ako man kan katotoohan.
4 Sa trabaho, sa eskuelahan, o sa pakikiiba sa mga paryente asin kataraed, an satong marahay na paggawe, kaiba an satong pagpapatotoo, puedeng magpangyari sa iba na pamurawayon an Dios.—Mat. 5:16.