Pagpapatotoo Paagi sa Marahay na Gawe-Gawe
1 Sa mapagkonsinteng sosyedad ngonyan, an dakol na hoben daing ingat na sinasayang an saindang buhay sa droga, inmoralidad, rebelyon, asin kadahasan. Sa kabaliktaran, an arogan na gawe-gawe nin marahay na mga hoben sa Kristianong kongregasyon nakarerepreskong paghelingon asin seguradong sarong bagay na magayon para ki Jehova. Iyan nagseserbing mapuersang patotoo na puedeng makaakit sa iba sa katotoohan.—1 Ped. 2:12.
2 Ipinaheheling nin dakol na eksperyensia na an marahay na gawe-gawe nin mga hoben na Kristiano nagkaigwa nin positibong epekto sa mga nagmamasid. Nagtataram dapit sa sarong hoben na Saksi na estudyante nia, an sarong maestra nagsabi sa bilog na klase na an Dios kan daragitang ini, si Jehova, iyo an tunay na Dios. Sinabi nia ini huli ta an gawe-gawe kan daragita pirmeng magalang. An saro pang maestro nagsurat sa Sosyedad, na nagsasabi: “Boot kong komendaran kamo huli sa marahay na mga hobenes na nasa saindong relihion. . . . An saindong mga hobenes talagang arogan. Iginagalang ninda an mga gurang, marahay an ugale, asin mabini sa paggubing. Asin tatao sinda sa Biblia! Iyan an relihion!”
3 An saro pang maestra naghanga sa marahay na gawe-gawe nin sarong siete anyos na Saksi sa saiyang klase. Nagustohan nia an mahoyo asin marahay na personalidad kan solterito, na pinangyari siang napapalaen na marhay sa ibang mga solterito. Naghanga sia sa pagigin seryoso kan solterito sa saiyang mga paniniwala sa relihion—dai sia nasosopog na mapalaen huli sa paniniwala nia. Naheheling nia na sinanay an konsensia kan solterito asin na ‘namimidbid nia kun ano an tama asin sala.’ (Heb. 5:14) Sa kahurihurihi, dinalaw kan ina kan solterito an maestra, asin naponan an pag-adal sa Biblia. Pag-abot nin panahon, nabautismohan an maestra asin sa huri nagin regular payunir!
4 An sarong hoben na lalaki naimpluwensiahan kan marahay na gawe-gawe nin sarong Saksi sa saiyang eskuelahan. Sia totoong napapalaen—magalang na marhay, mainadal, asin pirmeng mabini sa saiyang paggubing; siring man, bakong arog kan ibang mga daragita, sia dai noarin man nakikigitilan sa mga solterito. Naheheling nia na an daragita namumuhay sono sa mga prinsipyo sa Biblia. Hinapot kan hoben na lalaki an daragita manongod sa saiyang mga paniniwala sa relihion asin naghanga an lalaki sa saiyang nanodan. Nagpoon siang mag-adal, dai nahaloy nabautismohan, asin pag-abot nin panahon nakikabtang sa ministeryo bilang payunir asin naglingkod sa Bethel.
5 Kun kamo sarong hoben na Kristiano na nagmamawot na magtao nin marahay na patotoo sa iba, maanan nindo an saindong gawe-gawe sa gabos na paagi. Nungkang magpabaya paagi sa pag-oyon sa mapagkonsinteng mga aktitud, punto de vista, o estilo nin pamumuhay kan kinaban. Magtao nin halangkaw na klaseng halimbawa sa saindong pagtaram, paggubing, asin pag-alinyar, bako sanang mantang nakikikabtang sa ministeryo sa langtad asin sa mga pagtiripon kan kongregasyon kundi siring man mantang nasa eskuelahan patin kun nag-aaling-aling. (1 Tim. 4:12) Magkakaigwa kamo nin tunay na kagayagayahan kun igwa nin magkainteres sa katotoohan huli ta kamo padagos na ‘nagpapasirang kan saindong liwanag’ paagi sa saindong marahay na gawe-gawe.—Mat. 5:16.