Mga Hoben na Nagliliwanag Siring sa mga Ilaw
1. Paano ipinaparisa kan Biblia na magigin lataw an mga Kristiano, asin paano aplikado sa mga hoben na Kristiano ngonyan an mga tataramon na iyan?
1 Sinabihan ni Jesus an saiyang mga disipulo: “Kamo iyo an liwanag kan kinaban.” (Mat. 5:14, 16) Sinda magigin lataw siring sa sarong siudad na namumugtak sa itaas nin bulod, na nagkikinang sa saldang. Ngonyan, dakol na hoben na Kristiano an “nagliliwanag siring sa mga ilaw sa kinaban” paagi sa saindang tanos na gawe-gawe asin maigot na pagpapatotoo.—Fil. 2:15; Mal. 3:18.
2. Ano an nagkapirang paagi na kamo makakapagpatotoo sa mga maestra asin kaklase?
2 Sa Eskuelahan: Paano kamo puedeng magpatotoo sa eskuelahan? May mga hoben na inaprobetsaran an mga pagtokar sa klase manongod sa mga tema na arog kan droga, ebolusyon, asin terorismo—sa pagsambit nin pira sana. An sarong tugang na babae ginamit an asignadong komposisyon dapit sa terorismo tangani na makapagpatotoo manongod sa Kahadean nin Dios bilang an tunay na paglaom para sa katawohan. Naghanga an maestra sa inandam na marhay na report, asin ini nagbukas kan dalan para sa dugang pang pagpatotoo.
3. Paano nindo mapapasirang an saindong liwanag sa eskuelahan paagi sa saindong paggawe?
3 An saro pang paagi na sumirang siring sa ilaw iyo an saindong paggawe saka mabining paggubing asin pag-alinyar. (1 Cor. 4:9; 1 Tim. 2:9) Kun naheheling kan mga estudyante asin maestra na laen an gawe nindo, tibaad maakit an nagkapira sa katotoohan bilang resulta kan marahay na paggawe nindo asin magtatao iyan sa saindo nin oportunidad na sabihon an mga katotoohan sa Biblia. (1 Ped. 2:12; 3:1, 2) Tibaad bakong pasil an pagpaheling nin diosnon na paggawe, alagad kamo bebendisyonan nin igo ni Jehova. (1 Ped. 3:16, 17; 4:14) Tangani na mapukaw an interes sa maogmang bareta, puede kamong magbasa nin literatura sa Biblia durante nin pahingalo o iwalat iyan sa lugar na naheheling nin iba.
4. Ano an nagkapirang pakinabang sa pagpapatotoo sa eskuelahan?
4 An pagpasirang kan saindong liwanag sa eskuelahan nagpapakosog kan pagtubod nindo asin nagtatabang sa saindo na magkaigwa nin kapakipakinabang na pag-orgolyo sa paglilingkod ki Jehova. (Jer. 9:24) Iyan nagseserbi man na proteksion. An sarong tugang na babae nagsabi, “An sarong pakinabang sa pagtaram manongod sa sakong mga tinutubod iyo na an mga estudyante dai nagpoprobar na impluwensiahan ako sa paggibo nin mga bagay na bakong kaoyon kan sinasabi kan Biblia.”
5. (a) Paano pinapahiwas nin nagkapirang hoben an saindang ministeryo? (b) Ano an saindong espirituwal na mga pasohan?
5 Pinahiwas na Paglilingkod: An saro pang paagi na an dakol na hoben nagliliwanag siring sa mga ilaw iyo an pagpahiwas kan saindang ministeryo. Pagkatapos nin haiskul, an sarong tugang na lalaki nagbalyo tangani na maglingkod kun saen mas dakula an pangangaipo para sa mga parabalangibog kan Kahadean. Sia kabtang nin sarong sadit na kongregasyon na may saro sanang magurang sa kongregasyon. “Magayagaya ako digdi,” an isinurat nia sa sarong katood. “Nakakaginhawang marhay an ministeryo! Nakakaolay mi an kada kagharong sa laog nin mga 20 minutos huli ta gusto nindang madangog an gabos na masasabi niamo sa sainda.” Sabi pa nia: “Mawot ko kutana na an gabos na hoben arog man kaini an gibohon tanganing manamitan man ninda an naeeksperyensiahan ko. Mayo na nin mas marahay pa kisa paglilingkod ki Jehova paagi sa gabos na yaon sa sato.”
6. Ano an ipinag-oorgolyo nindo manongod sa mga hoben sa saindong kongregasyon?
6 Ipinag-oorgolyo nanggad niamo kamo mga hoben na nagliliwanag siring sa mga ilaw sa kinaban! (1 Tes. 2:20) Mantang pinaglilingkodan nindo si Jehova nin bilog nindong puso, kalag, isip, asin kosog, mag-aani kamo “nin mananggatos ngonyan sa panahon na ini . . . asin sa madatong na sistema nin mga bagay buhay na daing katapusan.”—Mar. 10:29, 30; 12:30.