“Nagliliwanag Siring sa mga Ilaw”
1 Sa tahaw nin espirituwal asin moral na kadikloman kan presenteng sistema nin mga bagay, mga sais milyon na parasamba sa tunay na Dios, si Jehova, an “nagliliwanag siring sa mga ilaw” sa 234 kadagaan sa bilog na kinaban. (Fil. 2:15) Ini an dahelan na kita nagigin madaling marisa. Paano niato ipinababanaag an mahalagang marhay na liwanag nin katotoohan na naggigikan ki Jehova?—2 Cor. 3:18.
2 An Satong Gawe-gawe: Naririparo tolos nin mga tawo an satong gawe-gawe. (1 Ped. 2:12) Naobserbaran nin sarong babae na an sarong Saksing katrabaho maboot asin matinabang saka dai naggagamit nin usmak na tataramon o nagngingisi sa malaswang mga suba. Kan probaran nin iba na probokaron an Saksi paagi sa pagraway kan yaon sia, sia nagdanay na kalmado pero marigon para sa tama. Ano an nagin epekto kaini sa babae? Natatandaan nia: “Naghanga akong marhay sa saiyang gawe-gawe kaya nagpoon akong maghapot manongod sa Biblia. Pinonan kong mag-adal kan Tataramon nin Dios asin sa huri nabautismohan ako.” Sabi pa nia: “An gawe-gawe nia an nakakombensir sa sako na siyasaton an mga tinutubod kan Mga Saksi ni Jehova.”
3 An satong aktitud sa autoridad, an satong pagmansay sa kinabanon na mga kaugalean, asin an satong nakapakokosog na pagtaram an dahelan na an Mga Saksi ni Jehova nagigin madaling marisa bilang mga tawo na namumuhay sono sa halangkawon na mga pamantayan sa Biblia. An siring na marahay na mga gibo puedeng magtao nin kamurawayan ki Jehova asin makaatraer sa iba na sambahon sia.
4 An Satong mga Tataramon: Siempre, an mga nakaheheling sa satong marahay na gawe-gawe tibaad dai man nakaaaram kun taano ta napapalaen kita apuera sana kun kita magtaram sa sainda manongod sa satong mga tinutubod. An mga katrabaho o kaeskuela mo daw nakaaaram na ika saro sa Mga Saksi ni Jehova? Naghahanap ka daw nin mga oportunidad na magpatotoo sa ordinaryong orolay? Desidido ka daw na ‘pasirangon an saimong liwanag sa atubangan nin mga tawo’ sa gabos na angay na okasyon?—Mat. 5:14-16.
5 An pag-otob sa sugo sa sato bilang mga paradara nin liwanag nagkakaipo nin espiritu nin pagsakripisyo sa sadiri. Pahihiroon kita nin bilog na kalag na aktitud na lingawan nguna an bakong gayong mahalagang mga bagay tanganing mas dakol an magibo niato sagkod sa mapupuede sa nagliligtas-buhay na paghuhulit asin paggibo nin mga disipulo.—2 Cor. 12:15.
6 Paagi sa satong mga gawe-gawe asin tataramon, logod na padagos kitang magliwanag siring sa mga ilaw. Kun iyo, tibaad mapahiro an iba na umiba sa sato sa pagtaong kamurawayan ki Jehova.