Kun Ano an Nagigibo kan Satong Ministeryo

1. Paano minamansay ni Jehova an satong ministeryo, asin ano an reaksion nin mga tawo?

¹ An mga Kristiano ilinaladawan kan Tataramon nin Dios na mapangganang nagmamartsa sa paglilingkod ki Jehova, na garo baga nasa parada sa kapangganahan. (2 Cor. 2:14-16) Mantang ipinapaaram niato an kaaraman nin Dios, an satong idinodolot na paglilingkod garo nakakapaogmang insenso ki Jehova. May mga tawong naeengganyar sa pagigin kaakit-akit kan maogmang bareta; an iba hinahaboan iyan. Alagad an negatibong reaksion kan kadaklan dai nangangahulogan na bakong mapanggana an satong gibohon. Estudyare kun ano an nagigibo kan satong ministeryo.

2. An satong ministeryo nagpapangyari sa sato na ipaheling an ano?

² Pagpakangdakula ki Jehova: Nag-iinsistir si Satanas na an mga tawo naglilingkod ki Jehova huli sa paslong mga dahelan. (Job 1:9-11) An Kristianong ministeryo nagtatao sa sato nin oportunidad na ipaheling na tunay an satong debosyon sa Dios. Padagos na kinukuyog kan dakol na parahayag an pagboot na maghulit asin gumibo nin mga disipulo sa ibong nin depisil na mga kamugtakan ninda mismo o kan pagkaindiperente nin mga tawo sa pankagabsan. An siring na maimbod na pakatagal nagpapagayagaya sa puso ni Jehova!—⁠Tal. 27:11.

3. Taano ta mahalagang marhay na padagos niatong ipaaram an ngaran asin katuyohan nin Dios?

³ Saro pa, an satong ministeryo may kabtang sa pagkaotob kan katuyohan nin Dios. May koneksion sa nagdadangadang na kalaglagan kan kinaban ni Satanas, si Jehova nagsasabi: “Kaipuhan na maaraman kan mga nasyon na ako si Jehova.” (Ezeq. 39:7) Tanganing maaraman ini kan mga nasyon, kaipuhan na padagos na ipahayag kan mga lingkod nin Dios an saiyang ngaran asin katuyohan “sa lambang nasyon asin tribo asin tataramon patin banwaan.”—⁠Kap. 14:6, 7.

4. Paano nagseserbing basehan sa paghokom an paghuhulit?

⁴ Basehan sa Paghokom: An paghuhulit kan maogmang bareta nagseserbi man na basehan sa paghokom. Sinabi ni apostol Pablo na si Cristo Jesus mamamalos sa “mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.” (2 Tes. 1:8, 9) An mga tawo hohokoman basado sa saindang reaksion sa maogmang bareta. May magabat nanggad na paninimbagan an mga lingkod nin Dios! Tanganing dai magkasala sa dugo, dai kita dapat na magpogol na ipahayag an nagliligtas-buhay na mensahe kan Kahadean.—⁠Gibo 20:26, 27.

5. Paano nababanaag sa satong ministeryo an pagkaherak nin Dios?

⁵ An satong nagpapadagos na mga paghihingoa na tabangan an satong kapwa na magkamit kan pabor nin Dios sarong kapahayagan kan pagkaherak ni Jehova. (1 Tim. 2:3, 4) Huling aram niato na an buhay nin mga tawo padagos na nagbabago, kita paorootrong nagsosongko sa sainda asin nagsasadol sa sainda na hanapon si Jehova mantang may panahon pa. Sa paggibo kaiyan, ipinapabanaag niato an “mamomoton na pagmalasakit kan satong Dios,” na ‘dai nagmamawot na an siisay man malaglag kundi mawot nia na an gabos makapagsolsol.’—⁠Luc. 1:78; 2 Ped. 3:9.

6. Paano kita nakikinabang sa pagdadanay na sibot sa paglilingkod ki Jehova?

⁶ Pinapakinabang an Satong Sadiri: An pagdadanay na sibot sa paglilingkod ki Jehova sarong proteksion para sa sato. Iyan nagtatabang sa sato na papagdanayon na “harani sa isip an presensia kan aldaw ni Jehova” asin likayan na maramogan kan presenteng maraot na sistema nin mga bagay. (2 Ped. 3:11-14; Tito 2:11, 12) Kun siring, kita logod magin “marigon, dai natatanyog, na danay na dakol an gigibohon sa gibohon kan Kagurangnan,” mantang aram niato na an satong mga paghihingoa sa Kristianong ministeryo bakong sayang sana.—⁠1 Cor. 15:58.