Edukasyon na Minagiya Pasiring sa Buhay
1 Nakakakontento nanggad na maheling an mga mata kan mga tawo na nagliliwanag sa kaogmahan mantang nasasabotan ninda an katotoohan hale sa Tataramon nin Dios! An pagpaabot sa iba kan kaaraman nin Dios asin kan saiyang katuyohan para sa katawohan talagang nakakakontento. An siring na edukasyon puedeng maggiya sa sarong tawo pasiring sa buhay na daing katapusan.—Juan 17:3.
2 Kun Taano ta Nakakalabi: An edukasyon iinaalok ngonyan sa haros gabos na paaging posible asin sa gabos na temang kayang isipon. (Ecl. 12:12) Alagad dai puedeng ikomparar an halaga kan siring na kaaraman sa “makangangalas na mga bagay nin Dios.” (Gibo 2:11) An edukasyon daw na iinaalok sa kinaban nakaparani man lamang sa katawohan sa Kaglalang asin nahimong ipaaram an saiyang katuyohan? Natabangan daw kaiyan an mga tawo na masabotan kun ano an nangyayari kun kita magadan o kun taano ta grabe an pagdusa? Nagtao daw iyan nin paglaom sa mga tawo? Nakatabang daw iyan na magrahay an areglo nin pamilya? Dai. Paagi sana sa edukasyon nin Dios na kita makakakua nin tunay na mga simbag sa pinakamahalagang mga hapot sa buhay.
3 An edukasyon nin Dios nag-aalok nin sarong bagay na biyong nawawara na sa kinaban ngonyan—an pagrahay sa moral. Biyong hinahale kan Tataramon nin Dios an rasismo, tribalismo, asin nasyonalismo sa puso kan mga nag-aako asin nag-aaplikar kan mga katokdoan kaiyan. (Heb. 4:12) Pinahiro kaiyan an mga tawo na talikdan an gabos na klase nin kadahasan asin na ‘isulog ninda an bagong personalidad.’ (Col. 3:9-11; Miq. 4:1-3) Dugang pa, an edukasyon nin Dios nagtao sa minilyon kan kosog na mapangganahan an hararom nang nakagamot na mga kaugalean asin karakteristiko na ikinakaanggot nin Dios.—1 Cor. 6:9-11.
4 Kun Taano ta Apretado Ngonyan: Ipinapaaram sa sato kan satong Kaharohalangkaweng Paratokdo an kahulogan kan mga panahon na kinabubuhayan niato. An saiyang makahulang mga paghokom igwa nin sunod sa panahon na impormasyon na dapat na ibalangibog sa bilog na daga. (Kap. 14:6, 7) Si Cristo namamahala na sa kalangitan, an pambilog na kinaban na imperyo nin falsong relihion lalaglagon sa dai na mahahaloy, asin an Kahadean nin Dios andam nang laglagon an gabos na daganon na gobyerno. (Dan. 2:44; Kap. 11:15; 17:16) Huli kaini, apretado na rekonoseron kan mga tawo an natutukaw na ngonyan na Hade nin Dios, na sinda lumuwas sa Dakulang Babilonya, asin na sinda mag-apod sa ngaran ni Jehova na may pagtubod. (Sal. 2:11, 12; Roma 10:13; Kap. 18:4) Logod na makikabtang kita sa pinakalubos na mahihimo sa pagtao sa iba kan edukasyon na minagiya pasiring sa buhay.