Magpaheling nin Personal na Interes—Paagi sa Paghapot Asin Paghinanyog
1 An kadaklan na tawo naoogmang magpahayag kan saindang mga punto de vista alagad habo ninda na tinotokdoan o inuusisa sinda. Kun siring, bilang mga ministrong Kristiano kaipuhan niatong manodan an teknika nin pag-enganyar sa mga tawo na magtaram paagi sa paghapot sainda.—Tal. 20:5.
2 An mga hapot niato maninigong nakakadagka, bakong nakakabigla. Kun naghaharongharong, an sarong tugang na lalaki naghahapot, “Sa paghona daw nindo maabot pa an panahon na tatrataron nin mga tawo an lambang saro na may dignidad asin paggalang?” Depende sa simbag, naghahapot pa sia, “Ano sa paghona nindo an kaipuhan tangani na magibo ini?” o “Taano ta siring kaiyan an paniniwala nindo?” Kun nagpapatotoo nin impormal asin nasa pampublikong mga lugar, an saro pang tugang na lalaki naghahapot sa mga may aki, “Ano an ikinakaogma nindong marhay bilang magurang?” Dangan naghahapot sia, “Ano an mga ikinakahadit nindong marhay?” Mangnoha na an mga hapot na ini nagtotogot sa mga tawo na ipahayag an saindang mga punto de vista na dai sinda ibinubugtak sa alanganon. Mantang nagkakalaenlaen an mga kamugtakan, tibaad kaipuhan niatong iadaptar an tema asin paagi kan satong mga paghapot tangani na ikabagay sa mga nasa teritoryo niato.
3 Pag-enganyar sa mga Tawo na Magtaram: Kun gusto nin mga tawo na sabihon sa saindo an saindang mga ideya, mapasensiang maghinanyog na dai minasaliot na dai man kaipuhan. (Sant. 1:19) Maboot na pasalamatan an saindang komento. (Col. 4:6) Puede sana kamong magsabi: “Interesante iyan. Salamat ta sinabi nindo iyan sa sako.” Komendaran sinda kun magigibo nindo iyan nin sinsero. Maboot na magbangon nin dagdag na mga hapot tangani na aramon kun ano an nasa isip ninda asin kun taano ta siring kaiyan an paniniwala ninda. Humanap nin puntong mapagkakaoyonan. Kun boot nindong darahon an atension ninda sa sarong teksto, puede kamong magsabi, “Napag-isip-isip na daw nindo ini bilang posibilidad?” Likayan an pagigin dogmatiko o parapakidiskutir.—2 Tim. 2:24, 25.
4 An pagsimbag nin iba sa satong mga hapot tibaad dependeng marhay sa kun paano kita naghihinanyog. Makakapagsabi an mga tawo kun baga kita naghihinanyog na may pagmakolog. An sarong nagbibiaheng paraataman nagkomento, “Kun kamo mapasensia asin andam na naghihinanyog sa mga tawo, may makangangalas na puersa iyan na makaakit asin saro iyan na marahayon na kapahayagan nin mainit na personal na interes.” An paghinanyog sa iba nagtatao sa sainda nin onra, asin tibaad makapahiro iyan sa sainda na maghinanyog sa maogmang bareta na hinihingoa niatong ipaabot.—Roma 12:10.