Pagpauswag kan Satong Kakayahan sa Ministeryo—Pagpahiling nin Personal na Interes
Kun Taano ta Mahalaga: Minansay ni Jesus an mga tawo bilang magkakalain na indibidwal, asin nagpahiling siya nin mamumuton na personal na interes sa sainda. Halimbawa, posibleng narisa ni Jesus an pagkasupog kan sarong lalaking bungog, kaya kan paumayan niya ini, ginibo niya iyan sa pribado, harayo sa kadaklan. (Mar. 7:31-35) Nagin makonsiderasyon man siya sa mga limitasyon kan mga disipulo niya asin dai niya sinda pinauranan nin kadakul-dakul na impormasyon. (Juan 16:12) Dawa kan yaon na siya sa langit, nagpahiling siya nin personal na interes. (2 Tim. 4:17) Bilang mga parasunod ni Cristo, gusto tang arugon siya. (1 Ped. 2:21; 1 Juan 3:16, 18) Mas magigin epektibo man kita sa ministeryo kun magigin makonsiderasyon kita sa kagharong asin naririsa ta an saiyang kamugtakan, pinagkakainteresan, asin mga ikinakahadit bilang indibidwal. Posibleng marhay na magdangog siya kun marisa niyang an pagdalaw ta bako sanang para magpaabot nin mensahe o magwalat nin literatura, kundi huling nagpahiling kita nin personal na interes.
Purbaran Ini Ngunyan na Bulan:
Magpraktis sa saindong pampamilyang pagsamba o tibaad sa ministeryo mantang pasiring sa sunod na harong, magpundo nguna asin praktison nindo kan saimong kapartner kun paano i-aadjust an saindong presentasyon sa sasabihon kan kagharong.
Sa nagkapirang pagtiripon bago maglingkod sa langtad, puwedeng tukaron o idemonstrar kan brother na manginginot an mga paagi nin pagpahiling nin personal na interes.