Magpaheling nin Personal na Interes—Paagi sa Pagigin Mapagmasid
1 Si Jehova Dios asin si Cristo Jesus nakakalabi sa pagrisa kan espesipikong mga pangangaipo nin mga tawo asin sa pagtao sa sainda nin tabang. (2 Cron. 16:9; Mar. 6:34) Kun marisa niato kun sa ano interesado asin nahahadit an mga nanonompongan niato sa satong ministeryo, ikakabagay niato an satong pag-atubang kan maogmang bareta oyon dian.
2 Magin Mapagmangno sa mga Detalye: Si Jesus mapagmasid kaidto. (Mar. 12:41-43; Luc. 19:1-6) Kaagid kaiyan, kun kita parani sa may pinto kan kagharong asin marisa niato an relihiosong mga dekorasyon, sarabihon na nakadukot sa mga lunadan, o mga kawatan na nasa natad, tibaad makagibo kita nin mga oportunidad na makapagpatotoo nin epektibo manongod sa maogmang bareta.
3 An panlauog asin hiro-hiro nin sarong tawo tibaad magparisa kan saiyang namamatean. (Tal. 15:13) Tibaad nangangaipo sia nin karangahan huli sa pagkagadan nin sarong namomotan o iba pang makamomondong pangyayari. Tibaad apresyaron nia an pagbasa niato sa saiya nin nagkapirang angay na teksto. (Tal. 16:24) Naghihidale daw sa pagluwas an kagharong o may kargang aki na naghihibi? Kun siring, tibaad mas marahay na sabihon na mabalik na sana kamo sa ibang panahon. Paagi sa pagigin makonsiderasyon asin ‘pagpaheling nin pakikipagkapwa,’ tibaad mapahiro niato an tawong iyan na maghinanyog pagbalik niato.—1 Ped. 3:8.
4 Ibagay an Saindong mga Komento: Nariparo ni apostol Pablo na may altar sa siudad nin Atenas na idinusay “Sa Dios na Dai Midbid.” Nakaimpluwensia ini sa paagi nin pag-atubang nia kan maogmang bareta, huli ta sinabi nia: “An sa daing pakaaram tinatawan nindo nin diosnon na debosyon, iyo ini an ibinabareta ko sa saindo.” An mataktikang paagi ni Pablo nakapahiro sa nagkapira na presente kaidto na estudyaran an mensahe kan Kahadean asin magturubod.—Gibo 17:23, 34.
5 Sa kaagid na paagi, an pagigin mapagmasid niato nakakatabang sa sato na marisa kun sa ano interesado an sarong tawo asin sa siring ikakabagay niato an satong pag-atubang. Gumamit nin mga hapot na puedeng makaengganyar sa kagharong na ipahayag an saiyang saboot. Isipon kun anong mga teksto an puedeng gamiton tanganing orog pang mapukaw an saiyang interes. (Tal. 20:5) An pagigin mapagmasid asin pagpaheling niato nin sinserong personal na interes sa iba matabang sa sato na ikahiras an maogmang bareta sa ekspertong paagi.