Pataluboon an Pag-apresyar sa Daing Kaagid na mga Kualidad ni Jehova
1 Sa satong ministeryo, bako sanang itinotokdo niato sa iba an pundamental na mga katotoohan sa Biblia. Tinatabangan niato an mga tawo na mamidbid si Jehova bilang persona asin pinapatalubo niato an pag-apresyar ninda sa saiyang daing kaagid na mga kualidad. Kun nanonodan kan mga sadiosan an puso an katotoohan manongod sa Dios, iyan may hararom na epekto sa sainda, na pinapahiro sindang gumibo nin mga pagbabago sa saindang buhay “tanganing maglakaw na angay ki Jehova sa katuyohan na lubos na makapaogma sa saiya.”—Col. 1:9, 10; 3:9, 10.
2 An Satong Bagong Pantabang sa Pag-adal: Sa kapinonan pa sana, dinadara kan librong Itinotokdo kan Biblia an atension sa mga kualidad ni Jehova. An mismong enot na kapitulo sinisimbag an mga hapot na: May pagmakolog daw talaga sa saindo an Dios?, Anong klase an Dios?, asin Posible daw na rumani sa Dios? Itinatampok man kan kapitulong iyan an kabanalan ni Jehova (par. 10), an saiyang hustisya asin pagmalasakit (par. 11), an saiyang pagkamoot (par. 13), an saiyang kapangyarihan (par. 16), asin an saiyang pagkaherak, pagkamaugayon, pagigin andam na magpatawad, pasensia, asin kaimbodan (par. 19). Sinusumaryo kan parapo 20 an mga bagay-bagay paagi sa pagsabing: “Mientras na orog kamong nag-aadal manongod ki Jehova, sia orog man na magigin tunay para sa saindo asin orog man kamong magkakaigwa nin dahelan na kamotan sia asin magin harani sa saiya.”
3 Paano niato magagamit an librong Itinotokdo kan Biblia tanganing matabangan an mga inaadalan sa Biblia na rumani ki Jehova? Pagkatapos na pag-olayan an sarong parapo na nagtatampok kan saro sa mga kualidad nin Dios, puede niatong hapoton an inaadalan sa Biblia, “Ano an sinasabi kaini sa saindo manongod ki Jehova bilang persona?” o “Paano kaini ipinapaheling na interesado sa saindo personalmente an Dios?” Paagi sa paggamit sa panapanahon kan siring na mga hapot durante kan pag-adal, tinotokdoan niato an satong mga inaadalan sa Biblia na horophoropon an saindang nanonodan asin tinatabangan niato sinda na pataluboon an pag-apresyar sa daing kaagid na mga kualidad ni Jehova.
4 Gamiton an Kahon sa Repaso: Sa pagtatapos kan lambang kapitulo, pakomentohan sa inaadalan sa Biblia sa sadiri niang tataramon an kada punto sa kahon na “Kun Ano an Itinotokdo kan Biblia.” Darahon an atension sa sitadong mga teksto. Tanganing maenkaminar an inaadalan sa Biblia na sabihon kun ano an nasa puso nia, kun beses puedeng ihapot nindo, “Ano an saboot nindo manongod sa itinotokdo kan Biblia sa puntong ini?” Sa paggibo kaiyan, bako sanang idinodoon nindo an prinsipal na mga punto kan kapitulo kundi namamansayan man nin malinaw kun ano an talagang tinutubod kan inaadalan sa Biblia. Matatabangan kaini an inaadalan sa Biblia na magpoon na pataluboon an relasyon ki Jehova.