Surat Hali sa Sangang Opisina

Namomotan na mga Parahayag kan Kahadean:

Naoogma kaming ibareta saindo na, durante kan nakaaging taon, sarong bagong Hantscho web rotary press an ininstalar sa Bethel sa Quezon City.

An bagong makinang pang-imprenta nag-abot sa sangang opisina hale sa Mejico kan Agosto 11, 2005. An instalasyon nagpoon kan Agosto 22, 2005 asin natapos kan Disyembre 23, 2005. Pitong tugang na lalaki asin babae gikan sa Mejico asin anom gikan sa Colombia an nag-abot tanganing tabangan an lokal na mga tugang sa pag-instalar kan makinang pang-imprenta. Labi-labi an kagayagayahan kan gabos kan an Torrengbantayan na Pebrero 1, 2006 an enot na magasin na nagluwas sa makinang pang-imprenta.

An bagong makinang pang-imprenta may timbang na 50 tonelada asin nangaipo nin pundasyon na 35 sentimetros an hibog. Iyan may labang 28 metros asin may langkaw na 4.39 metros sa pinahalangkaw na kabtang kaiyan. Iyan puedeng mag-imprenta nin 40,000 na magasin kada oras, na an boot sabihon 12 magasin kada segundo. An kada rolyo nin papel na may timbang na mga 500 kilos minalawig sana nin 25 minutos kun an makinang pang-imprenta nasa pinakamarikas na dalagan kaiyan. Tanganing tawan kamo nin ideya kun gurano kadakol na papel an ginagamit sa pag-imprenta kan satong mga magasin, kun an gabos na papel na ginamit sa sarong taon ilatag sa sarong deretsong linya, duwang beses na malilibot kaiyan an daga.

Durante kan Abril 2006, may total na 873,198 magasin an ikinapasakamot, an pinakahalangkaw na kabilangan kasuarin man. Padagos logod niato gabos na iwaras sa dakol An Torrengbantayan asin Awake! durante kan bagong taon nin paglilingkod. Iyo, ‘padagos logod na gibohon niato iyan nin lubos pa.’—1 Tes. 4:1.

An saindong mga tugang,

Sangang Opisina sa Pilipinas