Pusoan Alagad Mapagpatoninong
1 An dakol na tawo na satong nahuhulitan nagpapahayag nin sinserong mga paniniwala na sarongat sa katotoohan sa Biblia. Mantang kita dapat na maghulit na may pagkapusoan, mawot man niato na “makipagkatoninongan sa gabos na tawo” asin lumikay na makakolog nin boot na dai man kaipuhan. (Roma 12:18; Gibo 4:29) Paano kita magigin pusoan alagad ta mapagpatoninong mantang iinaatubang niato an mensahe kan Kahadean?
2 Humanap nin mga Mapagkakaoyonan: Linilikayan nin mapagpatoninong na tawo an mga pakipagdiskutiran. An dai man kaipuhan na pagpahimutik sa marigon na pinangaptan na mga paniniwala nin kagharong dai mapangyari sa saiya na magin andam na umako kan mensahe niato. Kun sala an sabihon nia, tibaad puede niatong mataktikang iintrodusir an sarong punto na puedeng mapagkaoyonan. Paagi sa pagdodoon kan pareho niatong pinaniniwalaan, tibaad mahale niato an ano man na negatibong saboot asin maakit niato an saiyang puso.
3 Kun papalampason niato an salang punto de vista nin kagharong, ikinokompromiso daw niato an o pinapaluya an puersa kan katotoohan? Dai. An satong asignasyon bilang Kristianong mga ministro, bakong pahimutikan an lambang salang pagsabot na satong naaatubang, kundi ihulit an maogmang bareta kan Kahadean nin Dios. (Mat. 24:14) Imbes na magin labi-labi an reaksion kun may ipinapahayag na salang punto de vista, puede niatong mansayon iyan bilang oportunidad na mabatid an kaisipan nin saro.—Tal. 16:23.
4 Papagdanayon an Dignidad: Igwa nin mga panahon na dapat kitang magin pusoan asin makosog an boot kun pinapahimutikan an salang mga katokdoan. Minsan siring, bilang mapagpatoninong na mga tawo, linilikayan niato an pag-olog-olog saka paggamit nin mapanraot na mga tataramon tanganing iladawan an mga naniniwala sa asin nagtotokdo nin sala. An aktitud nin pagkasuperyor nakakaparayo sa ibang tawo, alagad an mapakumbaba asin may kabootan na pamamaagi nagbubukas kan isip nin mga namomoot sa katotoohan. An pagpaheling nin paggalang sa mga naghihinanyog sa sato asin sa saindang mga paniniwala nagpapadanay kan saindang dignidad, sa siring ginigibong mas pasil para sa sainda na akoon an satong mensahe.
5 Kinonsiderar ni apostol Pablo an mga paniniwala kan saiyang mga hinulitan asin hiningoa nia na iatubang an maogmang bareta sa paagi na makakaakit sa saindang puso. (Gibo 17:22-31) Gikan sa boot siang nagin “gabos na bagay sa gabos na klase nin tawo,” tanganing ‘sa gabos na paagi ikaligtas nia an nagkapira.’ (1 Cor. 9:22) Magigibo man niato iyan paagi sa pagigin mapagpatoninong mantang pusoan niatong ihinuhulit an maogmang bareta.