‘Makipagkatuninungan Kamo sa Gabos na Tawo’

1. Anong konseho sa Bibliya an maninigo tang iaplikar pag nakakanupar kita nin anggot na kagharong?

¹ An mga lingkod ni Jehova mamumuton sa katuninungan, asin ihinuhulit ta iyan sa satong ministeryo. (Isa. 52:7) Pero kun beses, nakakanupar kita nin mga tawong anggot huli sa pagdalaw ta. Ano an makakatabang sa sato na makipagkatuninungan sa siring na sitwasyon?—Roma 12:18.

2. Taano ta mahalaga na sabuton niyato an mga nakakaulay ta?

² Sabuton Niyato Sinda: Minsan ngani may mga naaanggot huling kontra sinda sa katotoohan, an iba tibaad naiiritar huli sa iba pang dahilan. Tibaad bakong kumbenyente an oras kan pagdalaw ta. Tibaad may problema an kagharong kaya siya anggot. Dawa pa kun an maugmang bareta an nakapaanggot sa saiya, maninigo niyatong tandaan na posibleng nadaya siya kaya arog kaidto an reaksiyon niya. (2 Cor. 4:4) Kun sasabuton ta sinda, makakatabang iyan sa sato na magdanay na kalmado asin dai pagpersonalon an reaksiyon niya.—Tal. 19:11.

3. Paano kita makakapahiling nin paggalang sa kagharong?

³ Magpahiling nin Paggalang: Dakul sa teritoryo an makusog na nangangapot sa mga paniniwala ninda. (2 Cor. 10:4) May deretso sinda kun baga madangog sinda o dai. Dai niyato nuarin man gugustuhon na menuson an paniniwala kan kagharong o ipamati sa saiya na mas dakul kitang aram sa Bibliya. Kun pinapahali kita, maninigo na magalang kitang maghali.

4. Ano an buot sabihon kan magtaram na may kabuutan?

⁴ Magtaram na May Kabuutan: Dawa kun kita tinaraman nin maraot, an satong simbag maninigo na may kahuyuan asin kabuutan. (Col. 4:6; 1 Ped. 2:23) Imbes na makipag-argumento, pagmaigutan na mag-isip nin puntong pagkakauyunan. Puwede tang mabuot na ihapot kun ano an dahilan kan pagkontra niya. Pero, tanganing dai na siya lalong maanggot, kun minsan pinakamarahay na putulon na an pakikipag-ulay.—Tal. 9:7; 17:14.

5. Ano an mga pakinabang kun mapagpatuninong kita sa ministeryo?

⁵ Kun kita mapagpatuninong, posibleng marhay na magigirumduman kan kagharong an satong reaksiyon asin maghinanyog siya sa sunod na may magpatotoo sa saiya. (Roma 12:20, 21) Dawa kun garo baga makusog an pagkontra niya, puwedeng magin kapagtubod ta siya pag-abot nin panahon. (Gal. 1:13, 14) Magpahiling man siya nin interes sa katotoohan o dai, magtatao kita nin onra ki Jehova asin masasamnuhan ta an satong itinutukdo kun nagpupugol kita saka mapagpatuninong.—2 Cor. 6:3.