Pagpauswag kan Satong Kakayahan sa Ministeryo—Kun Paano Aatubangon an Anggot na Kagharong

Kun Taano ta Mahalaga: Dakul sa mga nakakaulay ta sa ministeryo an magagalang. Minsan siring, ihinula ni Jesus na may mga tawong mauungis sa sato. (Juan 17:14) Kaya dai magngalas kun may makaulay kitang anggot na kagharong. Kun mangyari ini, gusto tang sumimbag sa paagi na makakapaugma sa nagsugo sa sato, si Jehova. (Roma 12:17-21; 1 Ped. 3:15) Paagi kaiyan, posibleng marhay na dai na maggrabe an sitwasyon. Matao man iyan nin patotoo sa kagharong asin sa siisay man na nagmamasid, kaya posibleng marhay na magdangog na sinda pag magdalaw giraray an mga Saksi ni Jehova.—2 Cor. 6:3.

Kun Paano Gigibuhon:

Magin kalmado sana asin mainamigo. Makakatabang ini na humupa an sitwasyon. Dai tulos magkulog an buot. (Par. 7:9) Tibaad anggot lang an kagharong huling may problema siya o naabutan mo siya sa oras na alanganon sa saiya. Dawa pa habo niya kan mensahe ta, sa parati huli ini sa salang impormasyon.—2 Cor. 4:4.
Magsimbag sa mabuot asin magalang na paagi. (Tal. 15:1) Napagmata mo daw siya o nadisturbo? Dai ta ihinahagad nin dispensa an satong gibuhon, pero puwede kitang mapakumbabang maghagad nin dispensa huling naabutan ta siya sa panahon na bakong kumbenyente sa saiya. Anggot daw siya huli sa bakong totoong mga istorya na nadangog niya manungod sa sato? Kun iyo, puwede mong sabihon: “Naiintindihan ko kun taano ta naanggot kamo. Pero, garo bakong tama an nadangog nindo manungod samo. Puwede kong ipaliwanag?” Igwa daw siya nin dai inuuyunan sa satong mga paniniwala, arog baga nin manungod sa pagtitiwalag o sa dugo? Puwede mong sabihon: “Naiintindihan ko. Arog man kaiyan an iniisip nin iba. Puwedeng ipahiling ko sa saimo sa Bibliya an pinagbasehan kaiyan?”
Kun angguton an kagharong, tibaad mas marahay na maghali na asin dai na magsimbag. Kun sabihon niyang dai na siya pagdalawon kan mga Saksi ni Jehova, puwede mong sabihon na igagalang ta an gusto niya.

Purbaran Ini Ngunyan na Bulan:

Magpraktis sa panahon kan saindong pampamilyang pagsamba.
Pagkahali sa anggot na kagharong, pag-ulayan nindo kan kapartner mo kun ano an mas marahay kutanang ginibo nindo.