“Itaram an Tataramon nin Dios na Dai nin Takot”
1 Kun beses, nag-aalangan daw kamo na magtaram manongod sa saindong pagtubod kun may oportunidad sa eskuelahan o trabaho? Depisil daw para sa saindo na magpatotoo nin impormal sa mga paryente asin kataed o tibaad sa mga tawo na dai nindo midbid? Ano daw an makakatabang sa sato gabos na aprobetsaran an angay na mga okasyon na “itaram an tataramon nin Dios na dai nin takot”?—Fil. 1:14.
2 Dai Mag-alangan: Mag-aalangan daw kamong surogon an sarong dayupot na katood o paryente na sinasahotan nin bakong totoo? Si Jehova, an satong pinakadayupot na Katood, biyong minimisrepresentar sa laog nin dakol nang siglo. Igwa kita nin daing kaagid na pribilehio na magtao nin patotoo para sa satong dakulang Dios! (Isa. 43:10-12) An hararom na pagkamoot ki Jehova makakatabang sa sato na atubangon an mga pakamate nin pagigin masusupgon o takot asin makakapahiro sa sato na magtaram, na dai nag-aalangan na pusoan na magpatotoo sa katotoohan.—Gibo 4:26, 29, 31.
3 Girumdomon na maogmang bareta an satong mensahe. Iyan magtatao nin nagdadanay na mga pakinabang sa mga naghihimate dian. An pagkonsentrar sa halaga kan paghuhulit imbes na sa satong sadiri o sa mga nagkokontra sa sato matabang sa sato na maghulit na may pagkapusoan.
4 Mga Halimbawa nin Iba: Makakakua kita nin kosog gikan sa maimbod na pamumuhay nin iba na nagtaram kan tataramon nin Dios na dai nin takot. Halimbawa, makosog an boot na ibinalangibog ni Enoc an paghokom ni Jehova tumang sa bakong diosnon na mga parakasala. (Jud. 14, 15) Maimbod na naghulit si Noe sa mga tawo na indiperente. (Mat. 24:37-39) An mga Kristiano kan enot na siglo na “daing inadalan asin ordinaryo” padagos na naghulit sa ibong nin maringis na pagkontra. (Gibo 4:13, 18-20) An Torrengbantayan asin Awake! parateng igwa nin mga estorya nin buhay sa presenteng aldaw kan mga tawo na paagi sa pagtubod ki Jehova napaglabanan an takot sa tawo asin nagin maigot na mga ebanghelisador.
5 Magigin makosog an boot niato paagi sa pag-estudyar sa pamumuhay nin maimbod na mga lingkod kan suanoy na napaatubang sa masakit na mga situwasyon. (1 Ha. 19:2, 3; Mar. 14:66-71) Sinda ‘nagpakapusoan paagi sa satong Dios’ asin nagtaram na dai nin takot. Iyo man kita!—1 Tes. 2:2.