An Gabos Puedeng Makikabtang sa Paggibo nin Bagong mga Disipulo
1 An sarong bagong disipulo bakong resulta kan mga paghihingoa nin saro sanang tawo. Puedeng gamiton ni Jehova an gabos niang “kapwa trabahador” tangani na tabangan an mga inaadalan sa Biblia na tumalubo sa espirituwal. (1 Cor. 3:6-9) Tinatabangan niato indibiduwalmente an mga bagohan bako sanang paagi sa satong odok sa pusong mga komento sa Kristianong mga pagtiripon kundi paagi man sa satong marahay na paggawe, na nagtatao nin risang marhay na ebidensia kan pagpunsionar kan espiritu nin Dios sa satong buhay. (Juan 13:35; Gal. 5:22, 23; Efe. 4:22, 23) Ano pa an puedeng gibohon tangani na matabangan an mga bagohan?
2 Bilang Sarong Kongregasyon: Kita gabos makakapaheling nin interes sa mga nagpoon nang umatender sa mga pagtiripon paagi sa pagkaigwa nin inisyatiba na taratarahon sinda na may init asin makipag-olay sa sainda bago asin pagkatapos kan pagtiripon. Sa paghorophorop kan saiyang kaenot-enoteng pakikiasosyar sa kongregasyon, an sarong lalaki nagsabi: “Mas dakol akong nakamidbid na tunay na mamomoton na mga tawo, biyong mga dai kamidbid, sa laog nin saro sanang aldaw kisa nakamidbid ko sa iglesia na dinakulaan ko. Malinaw na nanompongan ko na an katotoohan.” Sia nabautismohan pitong bulan pagkatapos na umatender sa kaenot-enote niang pagtiripon.
3 Magtao nin sinserong komendasyon mantang an inaadalan sa Biblia nag-ooswag sa espirituwal. Sia daw haloy nang nagtatagal nin pagtumang? Regular daw siang nag-aatender sa mga pagtiripon? Sia daw igwa na kan kosog nin boot na magkomento? Nagpalista na daw sia sa Teokratikong Paadalan sa Pagmiministro o nagpoon nang makikabtang sa ministeryo? Tawan sia nin komendasyon sa saiyang pag-oswag. Ini makakarepresko asin makakaparigon sa saiya.—Tal. 25:11.
4 Bilang Sarong Nagkokondukta nin Pag-adal sa Biblia: May mga parahayag na nahimong tabangan an saindang mga inaadalan sa Biblia na mamidbid an indibiduwal na mga miembro kan kongregasyon paagi sa pakikipag-olay sa ibang mga parahayag na ibanan sinda sa pag-adal. Imbitaran an inaadalan sa Biblia sa mga pagtiripon kan kongregasyon sa pinakamadaling panahon na mapupuede. Kun magpoon na siang umatender sa mga pagtiripon, seguradohon na ipabisto sia sa iba. Maigot daw siang naghihingoa na labanan an sarong maraot na bisyo, arog baga nin paninigarilyo? Igwa daw sa saiyang kairiba sa harong na habo na sia mag-adal? Puede siang makinabang paagi sa pakikipag-olay sa sarong parahayag na napaatubang asin napaglabanan an kaagid na problema.—1 Ped. 5:9.
5 Nagkakaipo an mga bagohan nin espirituwal na suporta hale sa kongregasyon. An gabos makakatabang sa sainda na umoswag paagi sa pagpaheling nin sinserong personal na interes.