“Sia Nagtatao nin Puersa sa Napapagal”
1 Gabos kita napapagal sa panapanahon. Iyan bako sanang huli sa trabaho o iba pang pisikal na aktibidad kundi huli man sa mga problema na inaatubang niato sa “delikadong mga panahon [na ini] na masakit pakibagayan.” (2 Tim. 3:1) Bilang mga lingkod ni Jehova, paano kita nagkakaigwa kan espirituwal na kosog na kaipuhan tangani na dai magluwayluway sa satong ministeryo? Ginigibo niato ini paagi sa pananarig sa saro na “makosog an kapangyarihan,” si Jehova. (Isa. 40:26) Aram nia an satong mga pangangaipo asin tunay na interesado sia na tabangan kita.—1 Ped. 5:7.
2 Mga Probisyon ni Jehova: Pinapakosog kita ni Jehova paagi sa saiyang banal na espiritu, an iyo man sanang dai malalabanan na puersa na ginamit nia sa paglalang kan uniberso. Tinatabangan kita kan banal na espiritu nin Dios na ‘magkamit nin bagong puersa’ kun kita napapagal. (Isa. 40:31) Hapota an saindong sadiri, ‘Kasuarin ako huring namibi nin espesipiko para sa banal na espiritu na logod pakosogon ako na magibo an sakong Kristianong mga obligasyon?’—Luc. 11:11-13.
3 Mahalaga an aroaldaw na pagbasa asin paghorophorop sa ipinasabong na Tataramon nin Dios asin pagkakan sa espirituwal paagi sa regular na pag-adal kan satong Kristianong mga publikasyon. Kun gigibohon niato iyan, kita magigin siring sa sarong marambong na “kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan.”—Sal. 1:2, 3.
4 Ginagamit man ni Jehova an mga kapagtubod, na puedeng magin “tabang na nagpapakosog” sa sato. (Col. 4:10, 11) Napapakosog kita ninda sa mga pagtiripon kan kongregasyon paagi sa saindang nakakaparigon na pakikipag-olay, mga komento, asin pahayag. (Gibo 15:32) An Kristianong kamagurangan nangorognang nagtatao nin espirituwal na tabang asin nakakaginhawang pamparigon sa boot.—Isa. 32:1, 2.
5 An Ministeryo: Kun namamatean nindo na kamo napapagal na, dai kamo magpondo sa paghuhulit! Bakong arog nin dakol na iba pang aktibidad, talagang nakakaginhawa sa sato an regular na pakikikabtang sa ministeryo. (Mat. 11:28-30) An paghuhulit kan maogmang bareta nakakatabang sa sato na magkonsentrar dapit sa Kahadean nin Dios asin papagdanayon na nasa isip an panahon na daing sagkod asin an maogmang mga oportunidad dian.
6 Kadakol pang dapat gibohon bago laglagon an marigsok na sistemang ini. Dakol kitang dahelan na magdanay na marigon sa satong paglilingkod, na “nagsasarig sa kosog na itinatao nin Dios.” (1 Ped. 4:11) Paagi sa tabang ni Jehova matatapos niato an satong gibohon, huli ta “sia nagtatao nin puersa sa napapagal.”—Isa. 40:29.