Surat Hali sa Sangang Opisina

Namomotan na mga Parahayag kan Kahadean:

Naggagayagaya kita na maheling an pag-oswag kan gibohon sa teritoryo kan sangang opisina sa Pilipinas durante kan 2007 na taon nin paglilingkod! Naabot niato an pinakahalangkaw na bilang na 154,858 parahayag kan Abril. Sa bilang na iyan, 42,252 an nakikabtang sa bilog na panahon na paglilingkod bilang auxiliary, regular, o espesyal payunir, na 27% kan total na mga parahayag.

Durante kan Oktubre asin Nobyembre 2006, labing 8 milyones na kopya kan Kingdom News Num. 37, “Harani Na an Katapusan kan Falsong Relihion!” an idinistribwir sa bilog na teritoryo kan sangang opisina sa Pilipinas. Dangan kan Marso asin Abril 2007, 8 milyones na imbitasyon sa Memorial an idinistribwir. An katuyohan kan siring na mga kampanya iyo na tabangan an mga sadiosan an puso na makanood kun ano man nanggad an itinotokdo kan Biblia. Dakol an nahulitan sa mga paaging ini na tibaad dai kutana makakaolay kun bakong huli dian.

Nakakaparigon sa boot na maheling na labing 140,000 na pag-adal sa Biblia an ginibo kan Abril 2007. Ipinapaheling kaini na mas dakol na parahayag an nagigin mga paratokdo ngonyan kan Tataramon. (Mat. 28:19, 20) Ikinakaogma nin mayoriya na gamiton an librong Itinotokdo kan Biblia sa gibohon na ini. Poon kan iluwas an librong ini kan 2005, labi nang 1 milyon na kopya an ikinadistribwir sa bilog na Pilipinas. Naoogma kami na gumibo nin daramay kaiba nindo sa mahalagang aktibidad na ini, asin ipinapaabot niamo an samong mainit na Kristianong pagkamoot.

An saindong mga tugang,

Sangang Opisina sa Pilipinas