Gibohon Nindong Pasohan na Makapagkondukta nin Pag-adal sa Biblia
1 “Tingagan an saindong mga mata asin helinga an kaomahan, ta iyan maputi na tanganing anihon.” (Juan 4:35) An mga tataramon na iyan na sinabi ni Jesu-Cristo aplikado nanggad sa kamugtakan na inaatubang kan Kristianong mga ministro ngonyan.
2 May nanonompongan pang mga tawo na sadiosan an puso na nagmamawot na matokdoan dapit sa mga dalan ni Jehova. Risang-risa ini sa bilang nin bagong mga disipulo na nababautismohan kada taon. Kun kamo tunay na interesado sa pagkondukta nin pag-adal sa Biblia, ano an puede nindong gibohon?
3 Magbugtak nin Pasohan: Enot, magbugtak nin pasohan na makapoon asin makapagkondukta nin regular na pag-adal sa Biblia. Papagdanayon sa isip an saindong pasohan mantang nakikikabtang kamo sa ministeryo sa langtad. Mantang kalabot sa sugo sa sato bilang Kristiano an pagtotokdo kaiba an paghuhulit, gabos kita maninigong maghingoa na magkaigwa nin dakol pang oportunidad na makapagkondukta nin pag-adal sa Biblia.—Mat. 24:14; 28:19, 20.
4 Iba Pang Punto na Maninigong Isaisip: Kaipuhan kan mga parahayag kan Kahadean an odok sa pusong pamimibi. Kun beses nakakanompong kita nin mga tawo na namibi na logod tabangan sinda sa espirituwal. Sarong bendisyon nanggad na gamiton kita ni Jehova tanganing hanapon asin tokdoan an siring na mga tawo!—Hag. 2:7; Gibo 10:1, 2.
5 Sarong tugang na babae an namibi na magkaigwa logod sia nin inaadalan sa Biblia dangan nagbugtak sia sa pinagtatrabahohan nia nin mga kopya kan pulyetong Ano Gusto Nindong Makaaram Pa nin Orog Manongod sa Biblia? Kan an sarong babae kumua nin saro sa mga pulyeto, binasa iyan nin bilog, asin isinurat an hinahagad na impormasyon sa kupon, nakaolay kan tugang na iyan an babae asin nakapoon nin pag-adal sa Biblia.
6 An mga kapwa parahayag na epektibo sa pagpoon asin pagkondukta nin mga pag-adal sa Biblia puedeng makatabang sa saindo na maabot an saindong pasohan na makapagkondukta nin pag-adal sa Biblia. Mapagngayongayong maghanap nin kokonduktahan nin pag-adal sa Biblia, asin aprobetsaran an gabos na makukuang tabang tanganing maabot an pasohan na ini. Tibaad sa dai mahahaloy maeeksperyensiahan nindo an kagayagayahan sa pagkondukta nin pag-adal sa Biblia.