Tabangan an mga Inaadalan sa Biblia na Magin mga Parahayag kan Maogmang Bareta kan Kahadean
1 Mahiwas nanggad an sugo na itinao ni Jesus sa saiyang mga disipulo siring kan sinasabi sa Mateo 28:19, 20. Pinagbotan an mga disipulo ni Cristo na gumibo nin dakol pang disipulo na iyo na man an mapadagos kan paggibo nin mga disipulo. Ibubugtak an sarong pundasyon para sa pangultimong pambilog na kinaban na pagbalangibog kan maogmang bareta kan Kahadean nin Dios durante kan importanteng panahon kan katapusan, na kinabubuhayan na niato ngonyan.—Mat. 24:14.
2 An satong mga inaadalan sa Biblia tibaad iyo an satong mga aki o iba pa na gustong makipag-adal sa sato sa Biblia. Talagang gusto niatong tabangan an siring na mga tawo na akoon an personal na paninimbagan ninda na tabangan man an iba na magin mga disipulo ni Jesu-Cristo.—Luc. 6:40.
3 Iandam Sinda na Magpatotoo: Dagkahon an mga inaadalan nindo sa Biblia na sabihon sa iba an mga nanonodan ninda. Isaysay sa sainda an nakakaparigon sa boot na mga eksperyensia sa paglilingkod sa langtad. Sanayon an saindong mga aki poon sa amay na edad na makikabtang sa ministeryo sa makahulogan na paagi oyon sa saindang abilidad. (Sal. 148:12, 13) Ipaheling paagi sa tataramon asin halimbawa an saindong pag-apresyar sa ministeryo.—1 Tim. 1:12.
4 An ginagamit sana ni Jehova iyo an mga nag-aako asin nagkukuyog sa saiyang matanos na mga pamantayan. Siempre, an aram nin bagong mga parahayag bakong arog kadakol kan aram nin eksperyensiado, nagdusay, asin bautisadong mga ministro kan Kahadean, alagad an mga bagohan dapat na magtubod asin makapaliwanag kan pundamental na mga katokdoan sa Biblia. (Helingon an Organisado, p. 79-82.) Sinda maninigo na biyong siblag na sa “Dakulang Babilonya,” dai na nakikilabot sa politika, asin nag-aatender na nin regular sa mga pagtiripon kan kongregasyon.—Kap. 18:2, 4; Juan 17:16; Heb. 10:24, 25.
5 Kun kamo nagtutubod na an saro sa saindong mga inaadalan sa Biblia kualipikado nang magin dai pa bautisadong parahayag, maninigo na ipaaram ini sa nangengenot na paraataman. Iaareglo nia na duwang magurang sa kongregasyon an makipag-olay sa saindo asin sa saindong inaadalan sa Biblia tanganing determinaran kun baga sia kualipikado nang magin dai pa bautisadong parahayag kan maogmang bareta kan Kahadean kaiba kan kongregasyon. Sa siring magigin pribilehio nindo na pahiwason an pagsasanay sa saindong inaadalan sa Biblia mantang nag-iiba sia sa saindo sa paglilingkod sa langtad.